एचआयव्हीबाधित मातेचे बाळ होणार ‘एड्समुक्त’

चआयव्ही एड्सबाधित मातेकडून बाळाला या रोगाची लागण होऊ नये, यासाठी महाराष्ट्र राज्य एड्स नियंत्रण सोसायटीच्या वतीने राज्यात पीपीटीसीटी औषधप्रणाली राबविण्यात येत आहे

बारामती : एचआयव्ही एड्सबाधित मातेकडून बाळाला या रोगाची लागण होऊ नये, यासाठी महाराष्ट्र राज्य एड्स नियंत्रण सोसायटीच्या वतीने राज्यात पीपीटीसीटी औषधप्रणाली राबविण्यात येत आहे, त्यामुळे जन्माला येणारे बाळ ‘एचआयव्ही एड्समुक्त’ असेल, त्यासाठी या आधुनिक औषध प्रणालीचा वापर सुरू करण्यात आला आहे. यापूर्वी एचआयव्हीबाधित मातेकडून बाळाला या रोगाची लागण होऊ नये, यासाठी प्रसूतीपूर्वी व प्रसूतीनंतर असे दोन वेळा ‘नेव्हीरॅपीन’ औषधाचा डोस दिला जात होता, त्याचाही चांगला परिणाम झाला. जन्माला येणार्‍या बाळाला एड्समुक्त करण्यात यश आले. तरीही कोणताही धोका नको म्हणून पीपीटीसीटी ‘आॅप्शन बी’ या औषध प्रणालीचा वापर करण्यात येत आहे. त्याची प्रभावी अंमलबजावणी होण्यासाठी कोणत्याही गरोदर मातेला आयसीटीसीमध्ये पहिल्यांदाच एचआयव्हीबाधित म्हणून नोंदविल्यास सीडी ४ ची वाट न पाहता विनाविलंब टीएलई या औषधांची सुरुवात एआरटी केंद्रातून सुरू करण्याचे आदेश दिले आहेत. दुसर्‍यांदा प्रसूतीसाठी आलेल्या एचआयव्ही मातेला टीएलएलटीव्ही या औषधांची मात्रा सुरू करावी, अशा सूचना करण्यात आल्या आहेत. एचआयव्ही बाधित मातेकडून जन्माला आलेल्या बालकाला नेव्हीरॅपीन औषध जन्मापासून सहा आठवड्यांपर्यंत द्यायचे आहे. मातेकडून बाळाला अंगावरचे दूध पाजले जात असो अथवा नसो तरीही या औषधाचा वापर बाळासाठी करण्यात येत आहे. ज्या गरोदर माता आरोग्यकेंद्रात अचानक प्रसूतीसाठी येतात. ज्यांची रक्तनमुने चाचणी एचआयव्हीबाधित आहे, अशा गरोदर मातांना विनाविलंब या औषधांचा वापर करावा. त्याची नोंद एआरटी केंद्रात तातडीने करावी, असेही या औषध प्रणालीनुसार सुचविण्यात आले आहे, त्यामुळे एड्सबाधित मातांकडून जन्माला येणारे बाळ एड्समुक्त ठेवण्यावर भर दिला आहे. त्यात राज्य एड्स नियंत्रण सोसायटीला यश आले आहे. (प्रतिनिधी)