लोकमत न्यूज नेटवर्क
पुणे : पत्नीबरोबर झालेल्या जुन्या भांडणातून पतीने पत्नीचा राग तिच्या दुचाकीवर काढला असून, दगडाने गाडीची तोडफोड केली. तसेच पत्नीसह मेव्हणी व सासूला मारहाण केली.
याप्रकरणी सहकारनगर पोलिसांनी ३० वर्षांच्या पतीला अटक केली आहे. याबाबत एका २३ वर्षांच्या महिलेने सहकारनगर पोलिसांकडे फिर्याद दिली आहे.
फिर्यादी व आरोपी हे दोघेही पती-पत्नी आहेत. ते धनकवडीतील संभाजीनगर येथे राहतात. मागील काही दिवसांपूर्वी त्यांच्यात भांडणे झाली होती. फिर्यादी या आईकडे गेल्या होत्या. त्यांचा पती ९ जून रोजी मध्यरात्री साडेबारा वाजता तेथे आला. त्याने पत्नीची दुचाकी घेऊन रस्त्याच्या मध्यभागी लावली. गाडीचे पुढील मडगार्ड व पत्रा, पुढील, मागील हेडलाईट दगडाने फोडले. गाडीचे १० हजार रुपयांचे नुकसान केले. आवाज ऐकून फिर्यादी बाहेर आल्यावर आरोपी पतीने त्यांच्या डोक्यात दगड मारला. हाताने मारहाण केली. त्यांना सोडविण्यासाठी फिर्यादीची आई व बहीण आल्या असताना त्यांनाही त्याने मारहाण केली. त्यानंतर फिर्यादींनी पोलीस ठाण्यात धाव घेत पतीविरुद्ध तक्रार दाखल केली. त्यानुसार पोलिसांनी आरोपी पतीला अटक केली आहे. पुढील तपास सहकारनगर पोलीस करत आहेत.