तळेगाव स्टेशन : तळेगाव व परिसरात या मोसमात झालेल्या पहिल्या वादळी पावसात बरेच नुकसान केले. गारांसह पडलेल्या मुसळधार पावसाने शेतकर्‍यांची तारांबळ झाली. आतापर्यंत पिंपरी-चिंचवड व पश्चिम मावळातील भागात मान्सूनपूर्व पाऊस झाला. परंतु, तळेगाव व परिसरात आतापर्यंत चार-पाच वेळा पावसाने हुलकावणी दिली. सोमवारी अर्धा तास पावसाने गारांसह झोडपले. बरीचशी झाडे उन्मळून पडली. इंदोरी येथील मारुती मंदिराजवळील वडाची फांदी तुटून चाकण-तळेगाव रस्त्यावर पडल्याने गावातून जाणार्‍या रस्त्यावरील वाहतुकीस चांगलाच अडथळा झाला. काही घरांचे व गोठ्यांचे पत्रे वादळाने उडाले. सांगुर्डी, कान्हेवाडी, इंदोरी, येलवाडी, सुदुंबरे, वराळे, माळवाडी शिवारात उन्हाळी बाजरी काढणी चालू असल्याने कणसे भिजली. काही शेतातील बाजरीचे उभे पीक आडवे झाले. सोसाट्यांच्या वार्‍यामुळे शिवारातील कैर्‍यांचा व आंब्यांचा सडा शेताशेतात पसरला आहे. अद्याप उघड्यावर साठविलेली वैरण (गवत, कडबा, पेंढा वगैरे) भिजून मोठे नुकसान झाले आहे. अद्याप काढलेले कांदे शेतातच साठविल्याने त्यांचेही भिजून नुकसान झाले. या पावसाने हवेत मात्र गारवा आला आहे. उर्सेत बाजरी पीक आडवे उर्से : जोरदार वारा व पडलेल्या मुसळधार पावसामुळे पवन मावळातील बाजरीच्या पिकांना चांगलाच फटका बसला आहे. आठवडाभरापासून हवामानात चांगलाच उकाडा होत असल्याने दुपारी चारच्या दरम्यान पुन्हा जोरदार वार्‍यामुळे शेतकर्‍यांची चांगलीच पळापळ झाली. हाताशी आलेले बाजरीचे पीक या पावसामुळे काही ठिकाणी जमिनीवर झोपले. टॉमेटो, वांगी व इतर पिकांना अशाच प्रकारे एक, दोनदा पाऊस पडल्यास आलेले पीक हातची निघून जातील, अशी चिंता शेतकर्‍यांनी व्यक्त केली आहे.
तळेगाव परिसरात गारांसह जोरदार पाऊस
By admin | Updated: May 20, 2014 04:50 IST