पुणे : नोकरीसाठी आॅनलाइन रजिस्ट्रेशनद्वारे पैसे भरण्यास सांगून फसवणूक केल्याप्रकरणी उत्तर प्रदेश येथील ‘आपका रोजगार सव्हिर्सेस’ या संस्थेला पुुणे जिल्हा ग्राहक न्याय मंचाने दंड सुनावला. या संस्थेमुळे फसवणूक झालेल्या युवकाला ३४ हजार ४३२ रुपये परत देण्याचा आदेश मंचाने या संस्थेला दिला आहे. या प्रकरणी जगदीश वैद्य (रा. फुरसुंगी) यांनी ग्राहक मंचाकडे तक्रार केली होती. उत्तर प्रदेशमधील आपका रोजगार सव्हिर्सेस प्रा. लि. विरोधात वैद्य यांनी फसवणुकीची तक्रार केली होती. आॅनलाईन नोंदणी फी भरलेनंतर याबाबत अधिक चौकशी केली असता त्यांना आधी सात दिवस, नंतर १५ आणि त्यानंतर २१ दिवसात त्यांना पैसे मिळतील असे सांगण्यात आले. मात्र त्यांना पैसे परत मिळाले नाहीत. या प्रकरणी त्यांनी ग्राहक मंचाकडे तक्रार दाखल केली होती. ग्राहक मंचाचे अध्यक्ष व्ही. पी. उत्पात व सदस्य गीता घाटगे यांनी कागदपत्रांचे अवलोकन करून निकाल दिला. संबंधित कंपनीला नोटीस बजावूनही मंचापुढे कोणी हजर राहिले नाही. तक्रारदाराने मंचापुढे शपथपत्र, क्रेडिट कार्ड खात्याचा उतारा, कंपनीला पाठविण्यात आलेले ई-मेलचा नकला सादर केल्या. कंपनीने पैसे घेऊनही सेवा दिलेली नाही त्यामुळे तक्रारदार ३४ हजार ४३२ रुपये मिळण्यास पात्र आहे, असे मंचाने निकालात नमूद केले आहे. तसेच शारिरिक, मानसिक, आर्थिक त्रासापोटी पाच हजार रुपये देण्याचा आदेश मंचाने दिला. (प्रतिनिधी)
आॅनलाइन रजिस्ट्रेशनद्वारे तरुणाची फसवणूक
By admin | Updated: May 23, 2014 04:57 IST