लोकमत न्यूज नेटवर्क
पुणे : पंडित नेहरूंची बदनामी करणाऱ्या अभिनेत्री पायल रोहतगी हिच्यावर कारवाई होईलच, पण तिच्या मागचा बोलविता धनी वेगळा आहे, त्याचा शोध पोलिसांनी घ्यावा, अशी मागणी शहर काँगेसने केली.
शहराध्यक्ष रमेश बागवे, माजी आमदार मोहन जोशी, शहर सरचिटणीस रमेश अय्यर, फिर्यादी संगीता तिवारी, इंटकचे कैलास कदम, दत्ता बहिरट यावेळी उपस्थित होते. पंडित नेहरू आधुनिक भारताचे भाग्यविधाते आहेत. इंदिरा गांधी, राजीव गांधी यांनी देशासाठी बलिदान केले आहे. एखादी अभिनेत्री त्यांंची बदनामी करते त्यावेळी ती एकटी नसते. तिच्यामागे कोणीतरी भक्कमपणे उभे असते, त्यांचा शोध घ्यावा, अशी आमची मागणी असल्याचे या पदाधिकाऱ्यांनी सांगितले.
बागवे म्हणाले, या विचारधारेच्या प्रयत्नांमधून नेत्यांचीच नाही तर देशाचीही बदनामी होत आहे. यातून काँग्रेस कार्यकर्त्यांचा संयम सुटला तर त्याला जबाबदार कोण? जोशी यांनी रोहतगीच्या विरोधात काँग्रेस कार्यकर्ते ठिकठिकाणी फिर्यादी दाखल करतील असे सांगितले.
रोहतगी हिने चित्रफित तयार करून ती समाजमाध्यमांवर पोस्ट केली. हा विकृत प्रकार आहे. काँग्रेसच्या विचारांना, काँग्रेसच्या नेत्यांना भारतीय जनतेच्या मनात अढळ स्थान आहे, त्याला धक्का लावता येत नसल्याने संतापलेल्या कोणीतरी अशी विकृत माणसे उभी केली आहेत. पोलीस त्यांचा समाचार घेतीलच. पण खरे गुन्हेगार त्यांच्यामागे थांबलेले लोक आहेत, पोलिसांनी त्यांना पकडावे व त्यांच्यावर कडक कारवाई करावी. म्हणजे याप्रकारचे गुन्हे करण्यास कोणी धजावणार नाही, असे मत या पदाधिकाऱ्यांनी व्यक्त केले.