आव्हाळवाडी : वाघोली येथील जेएसपीएम शैक्षणिक संकुलाच्या शेजारी असणाऱ्या अनधिकृत बांधकामावर पोलीस बंदोबस्तात पीएमआरडीएच्यावतीने कारवाई करून अकरा जणांवर गुन्हे दाखल केले. या कारवाईबाबत काहीही हरकत नाही. परंतु, केवळ काही विशिष्ट बांधकामांवर कारवाई न करता हद्दीत मोठ्या संख्येने असणाऱ्या अनधिकृत बांधकामांवर कारवाई करून गुन्हे दाखल करावे, अशी मागणी एका निवेदनाद्वारे कारवाई झालेल्या अकरा जणांनी पीएमआरडीए आयुक्तांकडे केली आहे.
पीएमआरडीएच्या अधिकाऱ्यांनी २३ नोव्हेंबर रोजी अनधिकृत बांधकामांवर कारवाई केल्यानंतर २५ नोव्हेंबर रोजी ११ जणांवर संबधित पोलीस स्टेशनमध्ये ५३/१ अंतर्गत महाराष्ट्र प्रादेशिक नियोजन व नगररचना अधिनियमानुसार गुन्हे दाखल केले. पीएमआरडीएकडून बांधकामांवर केलेल्या कारवाईबाबत काहीही हरकत नाही. परंतु, हद्दीत असणाऱ्या अनधिकृत बांधकामांबाबत असंख्य तक्रारी दाखल असताना केवळ काही विशिष्ट बांधकामांवरच कारवाई करून गुन्हे केले जात आहेत.
कोट
२४ नोव्हेंबर रोजी राज्य शासनाच्या नगर विकास विभागाकडून वाघोली गाव पुणे महापालिकेमध्ये समाविष्ट करण्याबाबत परिपत्रक काढले आहे. त्यामुळे पीएमआडीएला बांधकामांवर कारवाई करण्याचा कायदेशीर अधिकार नाही. वाघोली गाव महापालिकेच्या की पीएमआडीएच्या हद्दीत याबाबत सामान्य नागरिकांमध्ये संभ्रम निर्माण झाला आहे.
- राजेंद्र सातव-पाटील, माजी उपसरपंच, वाघोली
कोट
पीएमआडीएच्या हद्दीमधील हजारोंच्या संख्येत तक्रारी असताना केवळ विशिष्ट बांधकामांवर कारवाई करून गुन्हे दाखल केले जात आहेत. वैयक्तिक फायद्यासाठी केलेल्या तक्रारीची दखल घेऊन कारवाई करणे अन्यायकारक आहे. पीएमआडीएने हद्दीत असणाऱ्या सर्वच अनधिकृत बांधकामांवर कारवाई करावी, अन्यथा याप्रकरणी न्यायालयाकडे धाव घेणार आहे.
-संदीप कटके, अध्यक्ष, जी. के. फाउंडेशन