राज्य शासनाने कोरोनानिर्बंधात थोडी सूट दिल्याबरोबर लोक मोठ्या संख्येने घरातून बाहेर पडू लागले आहेत व सध्या पावसाळा सुरू झाल्याने पर्यटनस्थळांकडे मोठ्या संख्येने जात आहेत. शासनाने पर्यटनस्थळे धार्मिकस्थळे घडण्यास परवानगी दिलेली नाही तरीही लोक भीमाशंकर, माळशेज, हरिश्चंद्रगड गड, लोणावळा खंडळा, ताम्हिणी घाट, माथेरान, महाबळेश्वर या ठिकाणी वर्षाविहारासाठी जात आहेत. अशा पर्यटकांच्या लोंढेच्या लोंढे या ठिकाणी दिसू लागले आहेत.
यातून कोरोना महामारीचा धोका आहेच तसेच या पर्यटनस्थळांवर धोकादायक पद्धतीने फिरून लोक आपला जीव धोक्यात घालत आहेत. नुकतेच शिक्रापूर येथील लक्ष्मण लहारे हा २९ वर्षांचा युवक आपल्या मित्रांसोबत भीमाशंकर जंगलात फिरायला गेला. कोणताही अंदाज नसताना कोंढवळच्या धबधब्यात उतरला व येथे पाय घसरून पडला. या घटनेला सहा दिवस झाले तरी त्याचा पत्ता लागलेला नाही. त्याला शोधण्यासाठी एनडीआरएफ, पोलीस, वन विभाग, स्थानिक ग्रामस्थ व इतर काही सेवाभावी संस्था यांनी भरपूर प्रयत्न केले. मात्र त्याचा अजूनही तपास लागला नाही.
पर्यटनस्थळांवर फिरण्याची परवानगी नसताना अशा प्रकारे कोंढवळच्या धबधब्यात उतरून या तरुणाने प्रशासना, स्थानिक ग्रामस्थांबरोबर व आपल्या कुटुंबीयांना देखील दु:खात लोटले. ही घटना घडल्यानंतर वन्यजीव विभागाने भीमाशंकर जंगलातील प्रेक्षणीय ठिकाणी फलक लावून जंगलातील सर्व वाटा बंद केल्या आहेत. तसेच ठिकठिकाणी वनविभागाचे कर्मचारी नेमून जंगलात फिरणा-या पर्यटकांवर कायदेशीर कारवाई करण्याचा निर्णय घेतला आहे. तसेच भीमाशंकरचे मंदिरदेखील बंद आहे. तरी कोणीही भीमाशंकरकडे येऊ नये, असे अवाहन दिलीप भुर्के यांनी केले आहे.
भीमाशंकर अभयारण्यातील कोंढवळ फाट्यावर वन्यजीव विभागाने लावलेला चेक पोस्ट.