लोकमत न्यूज नेटवर्क
पुणे : समृद्ध जीवन घोटाळाप्रकरणी अटकेत असलेल्या महेश मोतेवार यांनी श्रीमंत दगडूशेठ हलवाई गणपतीला दान केलेले सोन्याचे दीड किलोचे दागिने गुन्हे अन्वेषण विभागाने (सीआयडी) ताब्यात घेतले आहेत. महेश मोतेवारने सन २०१३ मध्ये दगडूशेठ गणपतीला सोन्याचा हार, त्रिशुळ, परशू असे ६० लाख ५० हजार रुपयांचे दीड किलोचे दागिने अर्पण केले होते.
धर्मादाय आयुक्तांच्या आदेशावरून ही कारवाई करण्यात आली. मोतेवारने ठेवीदारांच्या पैशातून ‘दानधर्म’ केल्याची माहिती सीआयडीच्या तपासात समोर आली होती.
समृद्ध जीवन मल्टिस्टेट पर्पज को-ॲापरेटिव्ह सोसायटी लिमिटेडने विविध योजनांच्या अमिषाने देशभरातील लाखो गुंतवणूकदारांना तब्बल २ हजार ५१२ कोटींचा गंडा घातला. याप्रकरणी मोतेवारची २०७ कोटींच्या संपत्तीवर ईडीने टाच आणली आहे. या प्रकरणात मोतेवारला सन २०१५ मध्ये अटक करण्यात आली आहे.
सीआयडीच्या उपविभागीय पोलीस अधिकारी मनीषा पाटील यांनी ‘लोकमत’ला सांगितले की, मोतेवारने पैशांचा वापर कोठे केला याचा शोध घेतला असता या दागिन्यांविषयी माहिती मिळाली. लोकांची फसवणूक केलेल्या पैशांतूनच त्याने हे दागिने घेतल्याचे सिद्ध झाले. त्यानंतर आम्ही दगडूशेठ हलवाई गणपती न्यासाशी संपर्क साधला. धर्मादाय आयुक्तांना हे दागिने तपास कामी ताब्यात घेण्याची आवश्यकता असल्याचे सांगितले. त्यानुसार धर्मादाय आयुक्तांनी न्यासाला तसे पत्र दिले. त्यानुसार ‘दगडूशेठ न्यासा’च्या विश्वस्तांनी संपूर्ण सहकार्य करुन हे दागिने आमच्या ताब्यात दिले आहेत. यापूर्वी महेश मोतेवार यांच्याकडून ४० लाख रुपयांचा मुद्देमाल जप्त केला आहे.
याबाबत ‘दगडूशेठ न्यासा’चे कोषाध्यक्ष महेश सूर्यवंशी यांनी ‘लोकमत’ला सांगितले, “ गोरगरिबांचा तळतळाट घेऊन अर्पण केलेले दागिने बाप्पाही स्वीकारणार नाही, अशी आमची भावना आहे. बाप्पाला कोणी काही अर्पण करत असेल, त्यावेळी तो कोण आहे, याची माहिती आम्हाला नसते. भावना आणि कायदा याच्यात गल्लत करता कामा नये. आम्ही कायदेशीर मार्गाने कार्य करतो. धर्मादाय आयुक्त हे आमचे प्रमुख आहे. त्यांच्या आदेशानुसार आम्ही दागिने ‘सीआयडी’च्या ताब्यात दिले.”