शिरुरमधील गुन्हेगारी यंत्रणेअभावी वाढतेय!

ना कार्यालयाची स्वत:ची इमारत, ना मंजूर पदाएवढे कर्मचारी कार्यान्वित आणि ना अधिकार्‍याचे लक्ष यामुळे शिरूर पोलीस ठाण्यातील गुन्हेदर वाढतानाचे चित्र आहे.

शिरूर : ना कार्यालयाची स्वत:ची इमारत, ना मंजूर पदाएवढे कर्मचारी कार्यान्वित आणि ना अधिकार्‍याचे लक्ष यामुळे शिरूर पोलीस ठाण्यातील गुन्हेदर वाढतानाचे चित्र आहे. वर्षभरात एकही दिवस टाळे नसलेल्या पोलीस ठाण्यात गुन्हेदर कमी करायचा असती तर सक्षम व पूरक यंत्रणा उभी राहणे गरजेचे आहे. ५४ गावे व जवळपास १०० किलोमीटर हद्द समाविष्ट असलेल्या शिरूर पोलीस ठाण्याची सध्याची इमारत ही ब्रिटिशकालीन आहे. या इमारतीची जागा ही महसूल विभागाचीआहे. तहसील कार्यालय, दुय्यम निबंधक कार्यालय व भूमी अभिलेख कार्यालयाच्या मध्यभागी असलेल्या पोलीस ठाण्याच्या इमारतीची सद्य:स्थिती पाहता पोलीस अधिकार्‍याला बसण्यासाठी असलेला स्वतंत्र कक्ष वगळता इतर अधिकारी, कर्मचारी यांच्यासाठी बसण्यास पुरेशी जागाच नाही. या जुन्या इमारतीच्या समोरील जागेत पाच वर्षांपूर्वी एक छोटासा हॉल बांधण्यात आला असून यातच एक सहायक निरीक्षक, २ उपनिरीक्षक, गुन्हे विभागाचे दोन कर्मचारी दाटीवाटीने बसत आहेत. याच हॉलमध्ये महिला दक्षता समितीलाही टेबल स्पेस देण्यात आला आहे. ठाणे अंमलदाराची खोलीही लहान आहे. अशात कामे कशी उरकायची, हा अधिकारी व कर्मचार्‍यांसमोर प्रश्न असतो. शिरूर पोलीस ठाण्याच्या हद्दीतील भागाची लोकसंख्या सध्या दोन लाखांवर एवढी असेल मात्र पोलीस कर्मचार्‍यांची संख्या इंग्रजांच्या काळात मंजूर संख्येप्रमाणे (कदाचित थोडी वाढ झाली असेल) आहे. या ठाण्यात पाच अधिकारी व ११३ कर्मचारी पदे अनेक वर्षांपासून मंजूर आहेत, मात्र चार अधिकारी व ७९ कर्मचारीच कार्यरत आहेत. न्हावरे, रांजणगाव औद्योगिक वसाहत, मांडवगण फराटा व टाकळीहाजी या ठिकाणी दूरक्षेत्र कार्यालय असून या कार्यालयांमध्ये अनुक्रमे एक अधिकारी, पाच कर्मचारी, एक अधिकारी, आठ कर्मचारी, चार कर्मचारी व एक अधिकारी, सहा कर्मचारी असा स्टाफ आहे. या व्यतिरिक्त बारामती अप्पर अधीक्षक कार्यालयात एक, पुणे ग्रामीण मुख्यालयात एक, स्थानिक गुन्हे अन्वेषण विभागात एक, दौंड उपविभागीय कार्यालयात एक, पुणे सत्रन्यायालय १, शिरूर न्यायालयात एक, पुणे ग्रामीण मुख्यालयात व रांजणगाव मंदिरात एक, कोर्ससाठी एक असे आठ कर्मचारी बाहेर असतात. गेल्या काही महिन्यांत मात्र तसे चित्र येथील अधिकार्‍याबाबत दिसत नाही. मनासारखे पोलीस ठाणे न मिळाल्याने या अधिकार्‍याचे या ठाण्यात लक्ष लागत नसून त्यांची या ठाण्यात उपस्थितीही नगण्य आहे. पोलीस महासंचालकांच्या निर्देशानुसार, प्रत्येक पोलीस ठाण्यात नागरिकांच्या समस्या जाणून घेण्यासाठी अधिकार्‍याने दर शनिवारी पोलीस ठाण्यात उपस्थित असणे बंधनकारक आहे. त्याचेही बहुतांशी या ठाण्यात पालन होताना दिसत नाही. (वार्ताहर)