लोकमत न्यूज नेटवर्क
जेजुरी : महाराष्ट्राचे कुलदैवत असणाऱ्या जेजुरीत रविवारी शिखर काठ्यांची यात्रा झाली. कोविडच्या प्रादुर्भावामुळे दरवर्षी भरणारी माघ पौर्णिमेची यात्रा रद्द झाल्याने शिखरी काठ्यांचा जल्लोष नव्हताच. केवळ संगमनेरकर होलम आणि सुपेकर खैरे यांच्या मानाच्या काठीने देवदर्शन उरकले. स्थानिक होळकर काठीने मात्र होळकर मंदिरातच मानपान स्वीकारत यात्रा पूर्ण केली.
सकाळी ११.३० वाजता संगमनेरकर होलम आणि दुपारी ३ वाजता सुपेकर खैरे यांच्या शिखरी काठ्यांनी मोजक्याच भाविकांच्या उपस्थितीत गडकोटात जाऊन येळकोट येळकोट जयमल्हारच्या गजरात, भंडाऱ्याची उधळण करीत देवभेटी उरकल्या. होलम काठीसोबत फक्त १० व्यक्तींनाच प्रवेश देण्यात आला होता. त्यांनी जिल्हाधिकाऱ्यांकडून परवानगी आणलेली होती. तर खैरे काठीसोबत फक्त पाच व्यक्तींनाच स्थानिक प्रशासनाकडून परवानगी देण्यात आली होती.
तीर्थक्षेत्र जेजुरीत दरवर्षी माघ पौर्णिमेनिमित्त मोठी यात्रा भरते. राज्यभरातून लाखांवर भाविक येथे येऊन कुलदैवत खंडोबाचे दर्शन घेत असतात. यात्रा दोन दिवस असते. कोविड प्रादुर्भावामुळे यंदा प्रशासनाने ही यात्रा रद्द केली होती. मात्र, नियमित भाविकांनी गडावर जाऊन देवदर्शन उरकले. द्रव संस्थान आणि प्रशासनाने यात्रेचे योग्य नियोजन केले होते. यामुळे यंदा यात्रा भरली नसली तरीही पौर्णिमेच्या दुसऱ्या दिवशी होणारी शिखरी काठ्यांचा पारंपरिक देवभेटीचा सोहळा अगदी मोजक्याच भाविकांच्या आणि केवळ मानाच्या काठीच्याच देवभेटीने झाला.
- मार्तंड देवसंस्थानकडून संगमनेर कर होलम काठीचे मानकरी तुकाराम काटे, भिकाजी गुंजाळ, दिलीप गुंजाळ, काशिनाथ होलम उमेश शिंदे, भाऊसाहेब जगताप तर सुपेकर खैरे काठीचे मानकरी नीलेश खैरे, अजित खैरे, दिलीप खैरे, अभय खैरे आदींचा सत्कार केला.
पोलिसांनीही यात्राकाळात चार पोलीस अधिकारी आणि ५० पोलीस कर्मचारी यांनी चोख बंदोबस्त ठेवला होता. जेजुरीकरांनी प्रशासनाला चांगला प्रतिसाद दिल्याने यात्रा शांततेत पार पडली.
- जेजुरी गडावर शिखर काठ्यांची देवभेट सोहळा कोरोनामुळे साधेपणाने साजरा करण्यात आला