लोकमत न्यूज नेटवर्क
पुणे : येथील ओशो आश्रम भारतातून परदेशात हलविण्याचा घाट घातला जात आहे. ओशोंचा वारसा हा केवळ भारताचा नसून, संपूर्ण जगाचा वारसा आहे. मात्र, ओशो आश्रम नष्ट करण्याचे कारस्थान सुरू असून, सर्व प्रकरणांची सीबीआय चौकशी व्हावी, अशी मागणी ओशो संन्यासी स्वामी गोपाल भारती आणि स्वामी झोरबा यांनी गुरुवारी येथे पत्रकार परिषदेत केली.
त्यांनी सांगितले, की ओशो इंटरनॅशनल फाउंडेशन आणि नवसंन्यास (रजनीश) फाउंडेशनचे ट्रस्टी आणि सध्याच्या व्यवस्थापन समितीद्वारे १८०० कोटींचा घोटाळा केलेला आहे. ओशो संन्याशांना समाधीपर्यंत जाण्यास बंदी करून धार्मिक अधिकारांपासून वंचित ठेवले जात आहे. ओशोंचा फोटो काढून, त्यांच्या वक्तव्याला काटून छाटून मनमानी पद्धतीने जनतेसमोर सादर केले जात आहे. ओशोंना एक रहस्यदर्शी सद्गुरू न मानता त्यांना केवळ एका लेखकाच्या स्वरूपात सादर केले जात आहे.
येणाऱ्या पिढ्यांनी ओशोंना विसरून जावे यासाठी हे कारस्थान रचले जात आहे, असा आरोप करून स्वामी गोपाल भारती आणि स्वामी झोरबा म्हणाले, की ओशोंची जगभरातील ६० ते ७० विविध भाषांत अनुवादित ग्रंथसंपदेची ‘रॉयल्टी’ कुठे जात आहे, याची चौकशी व्हावयास हवी. आमची मागणी केवळ ओशोंचा आश्रम विक्रीपासून वाचविण्याची नाही, तर या सर्व प्रकाराची सीबीआय व ईडीमार्फत सखोल चौकशी व्हावयास हवी. यासंदर्भात अनेक संन्याश्यांनी धर्मादाय आयुक्त आणि न्यायालयाचे दरवाजे ठोठावले आहेत. ओशोंचा वारसा वाचविण्यासाठी संपूर्ण भारतभर जनजागृती मोहीम हाती घेण्यात आली आहे.