--
शेलपिंपळगाव : मरकळ (ता. खेड) गावच्या हद्दीतील औद्योगिक वसाहतींमधील सहा ते सात खासगी कंपन्यांमधून केमिकलयुक्त तसेच विषारी धूर हवेत सोडला जात आहे. विशेष म्हणजे खुलेआम हवेत सोडल्या जाणाऱ्या धुरावर कुठलीही प्रक्रिया केली जात नाही. परिणामी विषारी धुरामुळे गावातील तसेच कंपनीलगतच्या स्थानिक रहिवाशांचे, तसेच पाळीव प्राण्यांचे आरोग्य धोक्यात आले आहे. संबंधित सर्व खासगी कंपन्यांनी तत्काळ उपाययोजना करून विषारी धुराचा प्रश्न मार्गी लावावा; अन्यथा ‘त्या’ सर्व कंपन्यांविरोधात आंदोलन करण्याचा इशारा स्थानिक नागरिकांनी दिला आहे.
आळंदीलगत असलेल्या मरकळ ग्रामपंचायत हद्दीत औद्योगिक वसाहतींचे मोठे जाळे पसरले आहे. गावच्या पूर्वेकडील बाजूला बहुतांशी मोठं-मोठे कारखाने विविध प्रकारच्या वस्तूंची निर्मिती करत आहे. त्या कारखान्यातून विषारी धूर हवेद्वारे वातावरणात पसरला जाऊन गावातील नाणेकरवस्ती, पाटीलवस्ती, वर्पेवस्ती तसेच गावाला प्रदूषित करत आहे. या धुरामुळे स्थानिक नागरिकांना विविध प्रकारचे आजार जडू लागले आहेत. तसेच अनेकांना श्वसनाचा त्रास होऊ लागला आहे. केमिकलयुक्त धुराच्या प्रादुर्भावामुळे परिसरातील पिकांच्या उत्पादनावरही परिणाम झाल्याचे स्थानिक शेतकऱ्यांचे म्हणणे आहे.
या विरोधात नाणेकरवस्ती, पाटीलवस्ती तसेच वर्पेवस्तीवरील रहिवाशांनी संबंधित कंपन्यांविरोधात ग्रामपंचायतीकडे लेखी तक्रार दाखल केली आहे.
या पार्श्वभूमीवर सरपंच भानुदास लोखंडे, उपसरपंच संतोष भुसे आदींनी शनिवारी (दि. २२) संबंधित सर्व कंपन्यांची पाहणी करून ‘त्या’ कंपन्यांवर कारवाईचे संकेत दिले आहेत. संबंधित कंपन्यांकडे अनेक वेळा तक्रारी करूनही उपाययोजना केल्या जात नसल्याने नागरिकांमधून तीव्र भावना व्यक्त होत आहेत.
--
डोळ्यांचा व श्वसनाचा त्रास
आधीच कोरोना संसर्गाने हैराण झालेल्या मरकळकरांना आता खासगी कंपन्यांमधून निघणाऱ्या विषारी धुराचा सामना करावा लागत आहे. केमिकलयुक्त धूर असल्याने त्याचा उग्र वास येत असून डोळ्यांत पाणी येत आहे. परिणामी नागरिकांना श्वसनाचा त्रास उद्भवू लागला आहे. काही कंपन्या धुरावर प्रक्रिया केल्याचे सांगत आहेत. मात्र, हे खोटे बहाणे असल्याचे स्थानिक नागरिकांचे म्हणणे आहे.
--
फोटो क्रमांक : २२ शेलपिंपळगाव विषारी धूर
फोटो ओळ : मरकळ (ता. खेड) हद्दीतील खासगी कंपन्यांमधून हवेत पसरला जाणारा केमिकलयुक्त विषारी धूर.