पळून जाणार्‍या चोरट्याला पकडले

येथील पोलीस प्रमोद उगले यांनी नागरिकांच्या मदतीने पळून जाणार्‍या एका मोटारसायकल चोराला गजाआड केले. सुरदेव रमेश नानावत (वय २१, रा.घोटावडे फाटा, ता. मुळशी)असे अटक केलेल्याचे नाव आहे.

तळेगाव दाभाडे : येथील पोलीस प्रमोद उगले यांनी नागरिकांच्या मदतीने पळून जाणार्‍या एका मोटारसायकल चोराला गजाआड केले. सुरदेव रमेश नानावत (वय २१, रा. घोटावडे फाटा, ता. मुळशी) असे अटक केलेल्याचे नाव आहे. याबाबत मिळालेली माहिती अशी - बुधवारी सकाळी ९.१५ च्या सुमारास कॉन्स्टेबल प्रमोद उगले हे तळेगाव पोलीस ठाण्याकडे येत असताना, विकासनगर - किवळे येथील शिंदे पेट्रोल पंपासमोर मोटारसायकलवरील एक तरुण संशयास्पद हालचाल करताना दिसला. उगले यांनी त्यास थांबविण्याचा प्रयत्न केला असता, तो मोटारसायकलवरून पळून जाऊ लागला. ग्रामस्थांच्या मदतीने उगले यांनी त्याचा पाठलाग केला. सुरदेव हा मामुर्डी - सांगवडे रस्त्याने जात असताना, मोटारसायकल घसरल्याने खाली पडला. शेतातून पळू लागला असता उगले यांनी स्थानिक ग्रामस्थांच्या मदतीने पाठलाग करून त्याला पकडले. दरम्यान, या मोटारसायकल चोरट्यास नागरिकांनी चोप दिला. मोटारसायकलबाबत व नाव, पत्ता विचारला असता, त्याने उडवाउडवीची उत्तरे दिली. नंतर त्यास देहूरोड पोलीस ठाण्यात आणण्यात आले. सुरदेव रमेश नानावत (रा. घोटावडे फाटा, ता. मुळशी) असे नाव असल्याचे त्याने पोलिसांना सांगिंतले. (वार्ताहर)