रेल्वेत गुन्हा घडल्यास तत्काळ ॲपवर नोंदवता येणार

लोकमत न्यूज नेटवर्क

प्रसाद कानडे

पुणे : रेल्वेत सामान चोरीला गेले, मारहाण झाली, महिलांचे दागिने लुटले यासाठी प्रवाशांना आपला प्रवास अर्धवट सोडून तक्रार देण्यासाठी आरपीएफ, जीआरपी (लोहमार्ग पोलीस) कडे जाण्याची गरज नाही. कारण, रेल्वे प्रशासनाने ''रेल सुरक्षा'' हे नवीन ॲप विकसित केलं आहे. यावर प्रवाशांना तत्काळ तक्रार देता येईल. त्यामुळे प्रवाशांचा वेळ वाचेल. शिवाय, तक्रारीसाठी होणारी चालढकल देखील थांबणार आहे.

रेल्वे मंत्रालयाने तयार केलेला ''रेल सुरक्षा'' ॲप लवकरच प्रवाशांच्या सेवेत दाखल होत आहे. हे ॲप विकसित करताना आरपीएफ व जीआरपी यांच्या यंत्रणेशी कनेक्ट केले आहे. शिवाय संबंधित राज्याच्या पोलीस यंत्रणेशी देखील हे जोडण्यात आले आहे. त्यामुळे रेल्वेत एखादा गुन्हा घडल्यास त्याची तत्काळ माहिती संबंधित राज्याच्या अतिरिक्त पोलीस महासंचालक यांच्यापर्यंत पोहचणार आहे. त्यामुळे आंतरराज्य गुन्हेगारला पकडणे सोपे होइल.

बॉक्स 1

आंतरराज्य गुन्हेगाराला पकडणे सोपे

लांबपल्ल्याच्या गाड्या या तीन ते चार राज्यातून प्रवास करीत असतात. अशा वेळी रेल्वेत एखादा गुन्हा घडवून आरोपी सहजपणे दुसऱ्या राज्यातील स्थानकावर उतरून पळून जाई. अशा आरोपींना पकडणे अनेकदा मुश्कील होते. नव्या ॲपमुळे देशातील सर्व राज्याच्या अतिरिक्त पोलीस महासंचालक कार्यालयाला जोडण्यात आहे. त्यामुळे एका राज्यात गुन्हा करून दुसऱ्या राज्यात पळून जाणाऱ्या आरोपीला पकडणे सोपे होईल.

बॉक्स 2

सिग्नल यंत्रणा तोडू नये म्हणून :

अनेकदा रात्रीच्या वेळी रेल्वेवर दरोडे पडतात. त्यावेळी दरोडेखोर हे सिग्नल यंत्रनेतील वायर तोडून टाकतात. त्यामुळे गाडीला रेड सिग्नल मिळतो. गाडी थांबली की दरोडा टाकतात आणि पळून जातात. रेल्वेने आता सिग्नल यंत्रनेत बदल करायचे ठरविले आहे. त्यामुळे आता सिग्नल यंत्रणेशी छेडछाड करता येणार नाही. परिणामी, गाडी थांबवून प्रवाशांना लुटता येणार नाही.

----------------------

रेल सुरक्षा ॲप आम्ही विकसित केले असून लवकरच ते प्रवाशासाठी उपलब्ध होईल. यामुळे रेल्वेतील गुन्ह्याचा तपास लवकर होईल. गुन्हाचे देखील प्रमाण घटेल.

अजय सदानी, प्रधान मुख्य सुरक्षा आयुक्त, मध्य रेल्वे, मुंबई