गांजा तस्करी करणारा गजाआड

अशोक शिवदास पवार (वय २१, रा. वांगी, ता. उस्मानाबाद) असे अटक करण्यात आलेल्या आरोपीचे नाव आहे. त्याचा साथीदार पळून जाण्यात यशस्वी ठरला. गणपती विसर्जन आणि रविवारच्या बाजारामुळे भिगवण राशीन राज्य मार्गावर दोघे गांजा घेऊन येणार असल्याची माहिती भिगवण पोलिसांना मिळाली. पोलीस उपनिरीक्षक विनायक दडसपाटील यांना सूचना करीत पोलीस पथक पाठवीत ही कारवाई केली. पोलिसांचा सुगावा लागताच आरोपींनी दुचाकीसह धूम ठोकण्याचा प्रयत्न केला. मात्र, पोलिसांनी मोठ्या शिताफीने पाठलाग करीत आरोपीच्या मुसक्या आवळल्या. मात्र, यातील एक आरोपी पोलिसांच्या तावडीत आला नाही. पोलिसांनी केलेल्या या कारवाईत १६ किलो गांजा तसेच दुचाकी असा एकूण ३ लाख ६ हजार रुपयाचा मुद्देमाल जप्त केला.