बेल्हा येथे दोन ठिकाणी घरफोडी

बेल्हा (ता. जुन्नर) येथील गावातच गजबजलेल्या मध्यवर्ती ठिकाणी तीन सशस्त्र चोरट्यांनी दोन ठिकाणी चोऱ्या केल्या. या घटनेत

बेल्हा : बेल्हा (ता. जुन्नर) येथील गावातच गजबजलेल्या मध्यवर्ती ठिकाणी तीन सशस्त्र चोरट्यांनी दोन ठिकाणी चोऱ्या केल्या. या घटनेत त्यांनी खोमणे यांच्या दवाखान्यातून दोन हजार रुपयांचा ऐवज चोरुन नेला. मात्र गावात गजबजलेल्या ठिकाणी चोरी झाल्यामुळे ग्रामस्थांमध्येभीतीचे वातावरण पसरले आहे. दरम्यान ही घटना काल पहाटेच्या सुमारास घडली.गावातील चांदणी चौक, पोळेश्वर चौक या नागरिकांनी कायम गजबजलेल्या मध्यवर्ती ठिकाणी गुरुवारी पहाटे दीड ते दोनच्या सुमारास कटावणी, बॅटरी अशी हत्यारे घेतलेल्या सशस्त्र तीन तरुण चोरट्यांनी चांदणी चौकातील अजित बिअरबार परमिटरूम दुकानाची कुलुपे तोडून गल्ल्यातील रोकड व मद्याची चोरी केली. त्यानंतर त्यांचा मोर्चा पोळेश्वर चौकातील डॉ. मनोहर विठोबा खोमणे यांच्या शांती नर्सिंग होम नावाच्या दवाखान्याच्या दिशेने वळविला. त्यांनी तळघराचा दरवाजा तोडून इमारतीत प्रवेश मिळविला. त्या चोरट्यांनी हॉस्पिटलमधील डॉक्टरांची रुग्ण तपासणी खोलीच्या ड्रॉवरमधील दोन हजार रुपये लंपास केले. यानंतर त्यांनी इमारतीतील डॉक्टरांच्या निवासाकडे जाण्यासाठी जिन्यातील दरवाजाची कुलुपे तोडण्याचा प्रयत्न केला पण तो असफल झाला. त्यांनी दुसऱ्या गेटची कुलुपे तोडून प्रवेश करत असताना झालेल्या आवाजाने डॉ. खोमणे यांच्या पत्नी दीपाली यांना जाग आल्यानंतर त्यांनी डॉ. खोमणे यांना उठवले. डॉ. खोमणे यांनी त्यांचा घराचा दरवाजा उघडण्याची आणि चोरटे जिना चढून समोर येण्याची वेळ एकच झाली. त्याचवेळी डॉक्टरांनी आरडाओरडा केल्याने ते तीन चोरटे पसार झाले. हॉस्पिटलच्या सीसीटीव्ही फुटेजमध्ये त्या तीनही चोरट्यांच्या छायाचित्रांसह हालचालींचे चित्रण झाले आहे.