शिक्षण प्रमुखांवर अहवालात ठपका?

आचारसंहिता सुरूअसतानाही शिक्षण मंडळाच्या शाळांच्या सुशोभीकरणासाठी कुंड्या खरेदी प्रकरणी शिक्षण मंडळ प्रमुख तुकाराम सुपे यांच्यावर चौकशी अहवालात ठपका ठेवण्यात आला आहे.

पुणे : आचारसंहिता सुरूअसतानाही शिक्षण मंडळाच्या शाळांच्या सुशोभीकरणासाठी कुंड्या खरेदी प्रकरणी शिक्षण मंडळ प्रमुख तुकाराम सुपे यांच्यावर चौकशी अहवालात ठपका ठेवण्यात आला आहे. या खरेदी प्रकरणात अनियमितता असून, आचारसंहितेत ही खरेदी करण्यात आली असून, या प्रकरणी सुपे यांच्यावर कारवाई प्रस्तावित करण्यात आली असल्याची माहिती सूत्रांनी दिली. दरम्यान, हा अहवाल कारवाईच्या शिफारसीसह महापालिका आयुक्त विकास देशमुख यांच्याकडे सादर करण्यात आला असून, उद्या (मंगळवारी) स्थायी समितीच्या बैठकीसमोर तो मांडण्यात येणार आहे. लोकसभा निवडणुकीची आचारसंहिता असतानाही मंडळाच्या शाळासाठी हजार रुपयाला एका कुंडीची खरेदी करण्यात आल्याचा प्रकार समोर आला होता. या कुंड्या खरेदी करताना प्रत्येक शाळेसाठी एक कुंडी एक हजार रुपयांना एक या प्रमाणे तीन कुंड्या खरेदी करण्यात आल्या होत्या. त्यासाठी नियमांप्रमाणे खरेदी प्रक्रिया पार न पाडता ही खरेदी करण्यात आल्याचे कॉंग्रेसचे विरोधी पक्षनेते अरविंद शिंदे आणि मनसेचे गटनेते रवींद्र धंगेकर यांनी हा प्रकार उजेडात आणला होता. त्यानंतर सर्वपक्षीय नगरसेवकांनी सुपे यांच्यावर कारवाईची मागणी करून चौकशी होईपर्यंत त्यांना सक्तीच्या रजेवर पाठविण्यासाठी मुख्य सभेत गोंधळ घातला. या मागणीनुसार आयुक्त विकास देशमुख यांनी सुपेंच्या चौकशीचे आदेश देऊन त्यांना १५ दिवसांच्या सक्तीच्या रजेवर पाठविले होते. अतिरिक्त आयुक्त ओमप्रकाश बकोरिया यांनी ही चौकशी नुकतीच पूर्ण केली असून, अहवाल आयुक्त विकास देशमुख यांना सादर केल्याचे सूत्रांनी सांगितले. (प्रतिनिधी)