पुणे : ‘तू आम्हाला आमच्या पाठीमागे चिडवतोस काय? तुझी गेमच करून टाकतो,’ अशी धमकी देत टोळक्याने संचारबंदी आदेशाचे उल्लंघन करीत दहशत निर्माण करण्याच्या हेतूने एकाला लोखंडी रॉड, बांबूने मारहाण केली. याप्रकरणी पाच जणांना बंडगार्डन पोलिसांनी अटक केली आहे.
विनोद उर्फ विन्या सुनील वाघमारे ( वय 19), साहिल उर्फ सोन्या राजू वाघमारे (वय 20), संघर्ष उर्फ भाव्या नितीन अडसूळ ( वय 20), श्याम किशोर काळे (वय 21), शुभम अनिल दिवारे (वय 21) अशी अटक केलेल्यांची नावे आहेत. ही घटना शुक्रवारी (दि.9) रात्री 10 च्या सुमारास ताडीवाला रस्त्यावरील कमल फ्लोअर मिलसमोर घडली. याप्रकरणी मुलाच्या आईने फिर्याद दिली आहे. पोलिसांनी दिलेल्या माहितीनुसार, शहरात शुक्रवारी (दि.9) सायंकाळी 6 पासून संचारबंदी लागू करण्यात आली आहे. मात्र, संचारबंदीच्या आदेशाचे उल्लंघन करीत जुन्या भांडणाचा आणि त्यांच्या पाठीमागे चिडवत असल्याचा राग मनात धरून फिर्यादीच्या मुलाला शिवीगाळ करून त्याला लोखंडी रॉड आणि बांबूने मारहाण करून जिवे ठार मारण्याचा प्रयत्न केला आणि परिसरात दहशत पसरवल्याबददल टोळक्यावर गुन्हा दाखल करून त्यांना अटक करण्यात आली. या प्रकरणाचा पुढील तपास पोलीस उपनिरीक्षक राहुल पवार करीत आहेत.
-------------------------------------------------------------------------