लोकमत न्यूज नेटवर्क
पुणे : मी इथला भाई आहे, तरी मला खुन्नस देतोस, सुरज ठोंबरेला का भेटतोस, असे म्हणून एका टोळक्याने कोयत्याने वार करुन तरुणाच्या खुनाचा प्रयत्न केला. या तरुणाला वाचविण्यासाठी आलेल्या दोघा मित्रांवरही वार करुन जखमी केले.
याप्रकरणी समर्थ पोलिसांनी चेतन संजय चव्हाण (वय २१, रा. मंगळवार पेठ), संकेत अनंत तारू (वय २१, रा. कसबा पेठ) या दोघांना अटक केली आहे. या घटनेत रहीम कुरेशी (वय २१,रा. सदानंदनगर) हा जखमी झाला आहे. ही घटना सोमवार पेठेतील सदानंदनगर येथे सोमवारी सायंकाळी पावणे सहा वाजण्याच्या सुमारास घडली. पोलिसांनी ६ जणांवर खुनाचा प्रयत्न केल्याप्रकरणी गुन्हा दाखल करण्यात आला आहे.
पोलिसांनी दिलेल्या माहितीनुसार, रहीम कुरेशी व त्याचे मित्र रफिक, अल्ताफ, उमर, बुरहान शेख यांच्यासोबत येथील एका बाकड्यावर गप्पा मारत बसला होते. त्यावेळी आरोपी दुचाकीवरून हातात कोयते फिरत तेथे आले. आम्ही इथले भाई असताना देखील हा नेहमी खुन्नस देतो, हा सुरज ठोंबरेला भेटत असतो, असे म्हणत कोयत्याने फिर्यादीवर वार करण्यात आले. त्यामध्ये हाताला व पोटाला दुखापत झाली. दरम्यान हा सर्व प्रकार सुरु असताना, फिर्यादीला वाचवण्यासाठी अल्ताफ व रफिक आले असता, त्यांना देखील कोयत्याने व लाथाबुक्यांनी मारहाण करुन जखमी केले. त्यानंतर टोळक्याने हातात कोयते फिरवत आम्ही येथील भाई आहोत, आम्हाला कोणी खुन्नस द्यायची नाही असे म्हणत परिसरात दहशत निर्माण केली. सहायक पोलिस निरीक्षक हेमचंद्र खोपडे अधिक तपास करीत आहेत.