मार्केटयार्ड पोलिसांनी सुरेश किसन माने (वय ३२, रा. धनकवडी) असे अटक केलेल्याचे नाव आहे. ही घटना मार्केटयार्डातील एका आयुर्वेदिक उपचार केंद्रात १३ ते १५ जानेवारीदरम्यान घडली. या प्रकरणी मसाज करणाऱ्या एका महिलेने फिर्याद दिली आहे.
ही महिला एका आयुर्वेदिक उपचार केंद्रात मसाज करण्याचे काम करते. सुरेश माने हा ग्राहक म्हणून या केंद्रात आला होता. त्याने तेथे मसाज करून घेतला. मसाज करताना त्याने फिर्यादीचे व्हिडीओ रेकॉर्डिंग केले. हा व्हिडीओ व्हायरल करतो, नाहीतर माझ्यासोबत शरीरसंबंध कर, अशी धमकी या तरुणाने महिलेला दिली. त्याने मसाज करतानाचा व्हिडीओ तिच्या मोबाइलवर पाठवून शिवीगाळ केल्याचे तक्रारीत म्हटले आहे.
शहरातील अनेक ठिकाणी मसाज सेंटरच्या नावाखाली वेश्या व्यवसाय केला जात असल्याचे पोलिसांनी केलेल्या कारवाईत दिसून आले आहे. असे असले, तरी अनेक ठिकाणी केवळ मसाजच केला जातो. तरीही तेथे काम करणाऱ्या महिलांकडे वाकड्या नजरेने पाहिले जाते. त्यांच्याकडूनही तशाच अपेक्षा ठेवल्या जातात.
या घटनेची माहिती मिळाल्यावर, मार्केटयार्ड पोलीस ठाण्याचे वरिष्ठ पोलीस निरीक्षक दुर्योधन पवार व पोलीस अधिकाऱ्यांनी घटनास्थळाला भेट देऊन माहिती घेतली. पोलिसांनी धमकावणाऱ्या सुरेश माने याला अटक केली असून, पोलीस निरीक्षक ढमढेरे अधिक तपास करीत आहेत.