चांदणी चौकात रात्रभर ‘दम मारो दम’

शहरातील राजकीय क्षेत्रातील नामांकित लोकांच्या नावावर चांदणी चौकातील बीडीपीच्या भागात सुरू करण्यात आलेल्या बेकायदेशीर हॉटेल्समध्ये रात्रभर ऐश दरबार सुरू असतो.

पुणे : शहरातील राजकीय क्षेत्रातील नामांकित लोकांच्या नावावर चांदणी चौकातील बीडीपीच्या भागात सुरू करण्यात आलेल्या बेकायदेशीर हॉटेल्समध्ये रात्रभर ऐश दरबार सुरू असतो. रात्रभर सुरू असलेल्या मद्य अन् हुक्कांच्या पार्ट्यांना हिंंजवडी पोलिसांनीच अभय दिल्याचे धक्कादायक वृत्त आहे. पुण्याबाहेरील तरुणांचे जथ्थेच या भागात रात्रभर झिंंगत आहेत. या भागात अतिक्रमण करून व्यवसाय करणार्‍यांवर महापालिका कारवाई करीत आहे. आजपर्यंत हिंंजवडी पोलिसांनी मात्र एकदाही बेकायदा दारूविक्री अन् हुक्काविक्री करणार्‍यांवर कारवाई केली नाही. याउलट महापालिकेच्या कारवाईनंतर या भागातील हॉटेल्स व्यावसायिकांना रात्रभर हॉटेल्स सुरू ठेवण्याचा अलिखित परवानाच दिला जात आहे. या भागात हॉटेल व्यवसाय करणार्‍या लोकांमध्ये पुणे शहरातील राजकीय क्षेत्रातील बड्या लोकांची नावे असल्याने या भागात पोलिसांकडून कारवाई केली जात नाही. या व्यावसायिकांनी वर्षानुवर्षे हितसंबंध जोपासल्यामुळे पोलीस कारवाई केली जात नसून, उलट पोलिसांच्या १०० क्रमांकाच्या तक्रारींनाही दिशाभूल करणारी उत्तरे देऊन पाठबळ देण्याचे काम केले जात आहे. हिंंजवडी पोलिसांच्या वतीने या भागात चारचाकी वाहनांतून गस्त घालण्यात येत असली तरी गस्तीची वाहनेही टोलनाक्यांच्या पुढे जात नसल्याने हॉटेल्स व्यावसायिकांवर कारवाई केलीच जात नाही. चांदणी चौकापासून पौड रस्ता हिंंजवडी पोलिसांच्या हद्दीत अनेक हॉटेल्स असून, यामधील सर्वच हॉटेल्समधून मद्याची सर्रास विक्री केली जात आहे. या भागातील हॉटेल्स व्यावसायिकांनीही पोलिसांशी संगनमत केल्यानेच पोलीस कारवाई केली जात नाही. याबाबत हिंंजवडी पोलिसांच्या वतीने रात्री १२ पासून गस्त सुरू असून, गस्तीची वाहने नियमित फिरत असल्याचे कायदेशीर उत्तर दिले जात आहे. (प्रतिनिधी))