पुणे : सिंहगड किल्ल्यावर सन २०१७ मध्ये शूरवीर तानाजी मालुसरे यांचे भित्तीशिल्प उभारल्यानंतर पुरंदर किल्ल्यावर धर्मवीर संभाजी महाराजांचे शिल्प उभारण्याची प्रक्रिया सुरू असतानाच, आता महापालिकेच्या वतीने जुन्नर तालुक्यातील शिवनेरी किल्ल्यावर राजमाता जिजाऊ आणि बाल शिवबाचे शिल्प उभारण्यात येणार आहे़
स्थायी समितीच्या बैठकीत या प्रस्तावाला मान्यता देण्यात आली असून, याकरिता दोन कोटी रुपयांची तरतूद करण्यात आली असल्याची माहिती स्थायी समितीचे अध्यक्ष हेमंत रासने यांनी पत्रकार परिषदेत दिली़
छत्रपती शिवाजी महाराजांचा महापराक्रम आणि राजमाता जिजाऊंचे संस्कार आणि मार्गदर्शन अवघ्या भारत देशाला प्रेरणादायी आहेत. या दोघांना मानवंदना देण्यासाठी हे शिल्प महापालिकेच्या वतीने उभारण्यात येत असल्याचे रासने यांनी सांगितले़
----------------------
महापालिका हद्दीबाहेर गडकिल्ल्यांवर शिल्प उभारणे हे महापालिकेचे काम आहे का, असा प्रश्न उपस्थित केला असता रासने यांनी छत्रपती शिवाजी महाराज हे आपले दैवत असून, ही शिल्पउभारणी हा श्रध्देचा व आपला वैभवशाली इतिहास जतन करण्याचा प्रयत्न असल्याचे रासने यांनी सांगितले़ तसेच साडेआठ हजार कोटी रुपयांचा अर्थसंकल्प असलेल्या महापालिकेने या खर्चाचा भार उचलणे गैर नसल्याचेही ते म्हणाले़
--------------------------