पुणे : लोकसभा निवडणुकीत मनसेचे उमेदवार दीपक पायगुडे यांची अनामत रक्कम जप्त झाल्यानंतर शहर पदाधिकार्‍यांनी या पराभवाची कारणमीमांसा करण्यासाठी बोलविलेल्या चिंतन बैठकीस पायगुडे यांनीच दांडी मारली. त्यामुळे या पराभवामुळे पायगुडे शहर पदाधिकार्‍यांवर नाराज असल्याची चर्चा दिवसभर रंगली होती. दरम्यान, या पराभवाची जबाबदारी मनसेचे शहराध्यक्ष बाळा शेडगे आणि प्रकाश ढोरे यांनी स्वीकारली असून विधानसभेसाठी जोमाने तयारी करण्याच्या सूचना शहर पदाधिकार्‍यांना देण्यात आल्या. अवघ्या दोन वर्षांपूर्वी झालेल्या महापालिका निवडणुकीत पुण्यातून साडेपाच लाख मते मिळविणार्‍या मनसेचे उमेदवार दीपक पायगुडे यांना लोकसभेसाठी १ लाख मतेही मिळाली नाहीत. तसेच शहरातील जवळपास सर्वच विधानसभा मतदारसंघांत त्यांचे मतदान घसरल्याचे दिसून आले. या पराभवाची कारणमीमांसा करण्यासाठी सर्व नगरसेवक, शहर पदाधिकारी, महिला आघाडी तसेच युवक आघाडीच्या पदाधिकार्‍यांची बैठक बोलविण्यात आली होती. त्यानुसार, सकाळी ही बैठक मनसे कार्यालयात झाली. मात्र, त्यास दीपक पायगुडेच उपस्थित नसल्याने सर्वांच्या भुवया उंचावल्या होत्या. तसेच पायगुडे यांच्या अनुपस्थितीबाबत विविध तर्कवितर्कांना उधाण आले होते.
चिंतन बैठकीस पायगुडेच गैरहजर
By admin | Updated: May 22, 2014 05:55 IST