लोकमत न्यूज नेटवर्क
पुणे : कोरोनावरील लसीकरणासाठी पुणे महापालिकेने पहिल्या टप्प्यापासून चौथ्या टप्प्यापर्यंतच्या लसीकरणाची तयारी केली आहे. एकूण २ हजार ९७ बूथच्या माध्यमातून प्रत्येक पुणेकरापर्यंत कोरोनाची लस पोहोचवली जाणार आहे. याव्दारे शहरातील ४० लाख ३९ हजार ५९९ नागरिकांना लस देण्याचे नियोजन करण्यात आले आहे़
पुणे महापालिकेचे आरोग्य प्रमुख डॉ़ आशिष भारती यांनी दिलेल्या माहितीनुसार, पहिल्या टप्प्यात शासनाच्या सूचनांनुसार आरोग्य कर्मचाऱ्यांना लस दिली जाणार आहे़ याकरिता महापालिकेकडे साधारणत: ४२ हजार जणांनी नोंदणी केली असली तरी, महापालिकेने शहरात १७९ ठिकाणी लसीकरण बूथ उभारून याव्दारे ५५ हजार ५८८ जणांना लस देण्याची व्यवस्था केली आहे़ हे काम साधरणत: चार दिवस चालेल.
दुसऱ्या टप्प्यात २५६ बूथ, १ हजार २४ मनुष्यबळासह २५६ स्वयंसेवक (लसीकरण पूर्ण करण्याचा कालावधी पाच दिवस), तिसऱ्या टप्प्यात २६९ बूथ २६९ स्वयंसेवक व १ हजार ७६ मनुष्यबळाची (लसीकरण पूर्ण करण्याचा कालावधी सहा दिवस) गरज लागणार आहे़ यानंतर ५० वर्षांवरील व्यक्तींच्या लसीकरणासाठी ३४८ बूथ उभारणी करून, ९ लाख ३२ हजार ७१८ जणांना ८ दिवसात लसीकरण प्रक्रिया पूर्ण केली जाईल़
चौथ्या व अंतिम टप्प्यात कोरोनावरील लस सर्वांना उपलब्ध करून दिली जाणार असल्याने, शहरातील प्रत्येक प्रभागात यासाठी बूथ उभारणी होईल. ही संख्या साधारणत: २ हजार ९७ इतकी राहणार आहे़ २३ दिवस चालणाऱ्या या लसीकरणासाठी ४ हजार १७९ मनुष्यबळ लागणार आहे. याव्दारे २७ लाख ९८ हजार १५४ जणांना लस देण्याचे नियोजन आहे़
चौकट
दोन टप्प्यात लसीकरण
प्रत्येक व्यक्तीला दोनवेळा कोरोना लस घ्यावी लागणार आहे. पहिल्या व दुसऱ्या डोसची प्रक्रिया प्रत्येकी ४६ म्हणजेच ९२ दिवस चालणार आहे़ सद्यस्थितीला महापालिकेकडे ८ लाख लस साठवण्याची क्षमता असल्याचे सहाय्यक आरोग्य प्रमुख डॉ. वैशाली जाधव यांनी सांगितले.
चौकट
जम्बो हॉस्पिटलचा वापर चौथ्या टप्प्यात शक्य
लसीकरणाच्या चौथ्या टप्प्यात सुमारे २७ ते २८ लाख पुणेकरांना लस दिली जाणार आहे़ यावेळी मुंबईच्या धर्तीवर जम्बो हॉस्पिटलमध्ये या लसीकरणाची व्यवस्था होईल का याचाही विचार केला जात आहे़ जम्बो हॉस्पिटल सध्या बंद करण्यात येत असले तरी, येथील सर्व सुविधा आहे तशाच ठेवण्यात आल्या आहेत़ त्यामुळे येथे लसीकरण करणे सोपे ठरणार असल्याने या पर्यायाचाही विचार केला जात असल्याचे आरोग्य प्रमुख डॉ. आशिष भारती यांनी सांगितले़