कॅन्टोन्मेंन्टच्या सभेत अधिकाऱ्यांची झाडाझडती

वॉर्डात विकासकामे करताना बोर्डाचे अधिकारीच दुजाभाव करत आहेत. तसेच नगरसेवकांमध्ये आपापसात भांडण लावण्याचे

खडकी : वॉर्डात विकासकामे करताना बोर्डाचे अधिकारीच दुजाभाव करत आहेत. तसेच नगरसेवकांमध्ये आपापसात भांडण लावण्याचे कट-कारस्थान करून सरकारी कामातही दुजाभाव करण्यात येत असल्याची तक्रार खडकी कॅन्टोन्मेंट बोर्डाच्या सर्वसाधारण सभेमध्ये नगरसेवक मनीष आनंद यांनी बोर्डाचे अध्यक्ष ब्रिगेडियर धीरज मोहन यांच्याकडे केली. त्यावर अध्यक्ष महोदयांनी बोर्डसमोरच त्या अधिकाऱ्यांची झाडाझडती घेतल्यामुळे सभेमध्ये काही वेळ वातावरण तंग झाले होते.खडकी कॅन्टोन्मेंट बोर्डाचे विद्युत अभियंता यांच्याबाबत मागील बऱ्याच दिवसांपासून कामात दिरंगाई करणे, दुजाभाव करणे, कामे वेळेवर न करणे, काम करण्यासाठी वारंवार टाळाटाळ करणे, तसेच काही वॉर्डांत नवीन विद्युतचे खांब गरज नसताना बसवणे तर काही वॉर्डांत गरज असूनही त्या ठिकाणी दुर्लक्ष करणे अशा नागरिकांच्या तक्रारी येत होत्या. त्यामुळे नगरसेवक मनीष आनंद आणि नगरसेविका पूजा आनंद यांनी पाटील यांच्या विरोधात बोर्डसमोर तक्रारींचा पाढा वाचून पाटील यांना जाब विचारला. त्यामुळे बोर्डाचे अध्यक्ष यांनी विजेच्या खांबांची दुरुस्ती करून त्याची सर्व माहिती द्या, असे पाटील यांना सांगितले. (वार्ताहर)