एकाच्या खिशातून महिलेने सोन्याची पोत चोरली

सेलू तालुक्यातील डिग्रस येथील जगन्नाथ दगडोबा बागवाले यांनी १४ ऑगस्ट रोजी दुपारी २.३० च्या सुमारास सेलू येथे मोंढा भागातील उत्तमराव सराफ यांच्या सोन्याच्या दुकानासमोर बसलेल्या व्यक्तीकडे सोन्याची पोत गाठण्यासाठी दिली. संबंधित व्यक्तीने पोत गाठून बागवाले यांना दिली. त्यानंतर त्यांनी ती पोत त्यांच्या खिशात ठेवली. त्यानंतर त्यांनी संबंधितास मजुरीचे पैसे दुसऱ्या खिशातून काढून दिले. नंतर परत दुसऱ्या खिशात पाहिले असता सोन्याची १० हजार रुपयांची पोत दिसली नाही. आजूबाजूला पाहिले असता पोत आढळून आली नाही. यावेळी त्यांनी दुकानाच्या सीसीटीव्हीत पाहिले असता एक महिला बागवाले यांच्या खिशातून पोत काढून घेताना दिसून आली. याबाबत जगन्नाथ बागवाले यांनी १४ ऑगस्ट रोजी सेलू पोलीस ठाण्यात फिर्याद दिली. त्यावरून अज्ञात चोरट्या महिलेविरोधात गुन्हा दाखल करण्यात आला आहे. अधिक तपास पोलीस करीत आहेत.