प्रस्तावित रुग्णवाढ लक्षात घेऊन मिळणार रेमडेसिवीर इंजेक्शन

राज्य शासनाच्या वैद्यकीय शिक्षण व औषधी द्रव्ये विभागाने यासंदर्भात ९ एप्रिल रोजी महत्त्वपूर्ण निर्णय घेतला आहे. रेमडेसिवीर इंजेक्शनचे राज्यस्तरावरून वाटप करताना रुग्णालयनिहाय व रुग्णांची संख्या विचारात घेऊन इंजेक्शनचा पुरवठा करण्याचे सूत्र निश्चित करण्यात आले आहे. या सूत्रानुसार परभणी जिल्ह्यात ३० एप्रिलपर्यंत १८ हजार ९९८ ॲक्टिव्ह रुग्णसंख्या होण्याची शक्यता गृहीत धरून या रुग्णांच्या १५ टक्क्यांप्रमाणे २ हजार ७३० इंजेक्शनचा साठा जिल्ह्याला प्रस्तावित केला आहे. रुग्णालयांमध्ये दाखल एकूण रुग्णसंख्येऐवजी सक्रिय रुग्णसंख्या वाढीचा १० टक्के दर विचारात घेऊन जिल्हानिहाय रेमडेसिवीरचे वितरण करण्यात येणार आहे. उपलब्ध झालेल्या रेमडेसिवीरपैकी दहा टक्के साठा आपत्कालीन साठा म्हणून जिल्हाधिकाऱ्यांच्या अखत्यारीत ठेवावा, इंजेक्शन वितरकांनी ३० एप्रिलपर्यंत सक्रिय रुग्णवाढ विचारात घेऊन संबंधित कंपनीकडून मागणी करून ठेवणे आवश्यक आहे, असे निर्देश राज्याचे अवर सचिव हेमंत महाजन यांनी दिले आहेत.