जिल्ह्यात ग्रामपंचायतीच्या निवडणुका होत आहेत. त्यासाठी १५ जानेवारी रोजी मतदान होणार आहे. जिल्ह्यातील कोरोना रुग्णांची संख्या कमी आहे. ग्रामीण भागात २५ रुग्ण उपचार घेत आहेत. त्यापैकी २२ रुग्ण होम आयसोलेशनमध्ये आहेत. या रुग्णांमुळे विलगीकरणात गेलेल्या साधारणत: १०० ते १५० मतदारांना मतदानाचा हक्क बजावता यावा यासाठी निवडणूक विभागाने या संदर्भाने मार्गदर्शन सूचनाही प्रसारित केल्या आहेत.
त्यानुसार मतदानाच्या दिवशी मतदान संपण्यापूर्वीचा अर्धा तास विलगीकरणातील नागरिकांसाठी राखीव ठेवण्याच्या सूचना दिल्या आहेत. प्रतिबंधात्मक उपायांचे काटेकोर पालन करून विलगीकरणातील नागरिकांना मतदान करता येणार आहे.
मतदान केंद्रांवर फिजिकल डिस्टन्स
जिल्ह्यात प्रत्येक मतदान केंद्रावर कोरोनाच्या अनुषंगाने काळजी घेण्याचे निर्देश दिले आहेत. मतदान कर्मचारी आणि मतदान प्रतिनिधी यांची बैठक व्यवस्था फिजिकल डिस्टन्स राखून करण्यात येईल. मतदान एजंट किंवा मतमोजणी प्रतिनिधींचे तापमान निर्धारित मर्यादेपेक्षा जास्त असल्यास मतदान केंद्र अधिकाऱ्याच्या परवानगीने त्यांच्याऐवजी राखीव एजंटांना काम सोपविण्याची मुभा देण्यात आली आहे.
मास्क करावा लागणार वर
मतदानासाठी आलेल्या मतदारांना त्यांची ओळख पटविण्यासाठी आवश्यकतेनुसार मास्क उतरवावा लागेल. ओळख पटल्यानंतर या मतदारांना पुन्हा मास्क घालता येईल. त्यानंतर मतदानाची प्रक्रिया करता येणार आहे.
केंद्रात केवळ एकच मतदार राहाणार
कोरोनाच्या संदर्भाने फिजिकल डिस्टन्स राखण्याच्या उद्देशाने मतदान केंद्रातील अधिकाऱ्यांसमोर केवळ एकच मतदार उभा राहू शकतो. मतदार नोंदणीवर सही करण्यासाठी आणि मतदानासाठी इव्हीएमचे बटन दाबण्यासाठी मतदारांसाठी सॅनिटायझरची व्यवस्था केली जाणार आहे. हे सॅनिटायझर दर्शनी भागात ठेवले जाईल तसेच मतदान केंद्रांवर कार्यरत कर्मचाऱ्यांसाठी फेसमास्क, सॅनिटायझर, फेसशिल्ड, ग्लोज उपलब्ध करून दिले जाणार आहेत.
ग्रामपंचायत निवडणुकीच्या मतदानासाठी कोरोनाच्या अनुषंगाने सर्व ती काळजी घेतली जाणार आहे. मतदान केंद्रांवर प्रतिबंधात्मक उपाययोजना करण्याच्या सूचना दिल्या आहेत. त्यासाठी आवश्यक असलेले साहित्यही उपलब्ध करण्यात आले आहे. फिजिकल डिस्टन्स, सॅनिटायझरचा वापर करणे बंधनकारक करण्यात आले आहे.
- डॉ. संजय कुंडेटकर, उपजिल्हाधिकारी, निवडणूक