परभणी जिल्ह्यात वीज वितरण कंपनीचे कृषी, औद्योगिक, वाणिज्य, घरगुती या वर्गवारीतील जवळपास अडीच लाख वीज ग्राहक आहेत. या वीज ग्राहकांना महावितरणकडून महिनाभर वीजपुरवठा केला जातो. त्यापोटी वीज बिल देण्यात येते. मात्र या बिलापासून मुक्तता मिळावी, यासाठी ग्रामीण भागात बहुसंख्य वीजग्राहक शेजाऱ्याकडून वीजपुरवठा घेतात. मात्र शेजाऱ्याकडून वीजपुरवठा घेणे हे अनधिकृत असून असा प्रकार आढळल्यास वीज ग्राहक व संबंधितावर वीज वितरण कंपनीच्यावतीने कारवाई केली जाईल. त्यामुळे वीज ग्राहकांनी आपला वीज पुरवठा शेजाऱ्याला न देता अधिकृतपणे वीज जोडणी घेण्यासाठी संबंधितास प्रवृत्त करावे, असे आवाहन वीज वितरण कंपनीच्यावतीने शुक्रवारी करण्यात आले.
कायदा काय सांगतो ?
एखाद्या वीज ग्राहकाने शेजाऱ्याला अनधिकृतपणे वीज जोडणी दिल्यास, वीज वितरण कंपनीच्या २००३ मधील कायद्यानुसार १२६ कलमांतर्गत मीटरमध्ये छेडछाड करणे, अनधिकृत वीज जोडणी घेणे, शेजाऱ्याला वीज देणे असे प्रकार आढळून आल्यास संबंधित वीज ग्राहक व इतरांवर गुन्हा दाखल होऊ शकतो, असे महावितरणचा कायदा सांगतो.
चोरी कळवा, दंडातील १० टक्के रक्कम बक्षीस मिळवा
परभणी जिल्ह्यात वीज वितरण कंपनीचे अडीच लाखहून अधिक वीज ग्राहक आहेत. या ग्राहकांकडे जवळपास तेराशे कोटी रुपयांची थकबाकी आहे. या थकबाकीमुळे अडचणीत आलेल्या महावितरण कंपनीला अनधिकृत वीजचोरी, वीजगळती यासह अनेक अडचणींना सामोरे जावे लागत आहे. त्यामुळे वीज वितरण कंपनीच्यावतीने अनधिकृत वीज चोरीला आळा घालण्यासाठी ‘चोरी कळवा दंडातील १० टक्के रक्कम बक्षीस मिळवा’ हा उपक्रम सुरू करण्यात आला आहे.