सीव्ही लिहिणं. किती अवघड काम. कुणाचा सीव्ही मागून कॉपी / पेस्ट केला, तर तो काही ‘आपला’ वाटत नाही आणि स्वत: काही धड लिहिता येत नाही. त्यात हमखास काही चुका होतात. नको त्या गोष्टी सीव्हीत घुसडल्या जातात आणि मिळणारी नोकरी मग हातची जाते. त्या कुठल्या चुका?
प्लीज, डू नॉट गेट पर्सनल
अगदी अलीकडच्या काळापर्यंत लोकं सीव्हीमध्ये नाव-गाव-लिंग-जन्मतारीख-धर्म-जात-पोटजात लिहायचे.
आता अजिबात लिहू नका.
सीव्हीत तुमची जन्मतारीख, धर्म, लिंग, लग्न झालंय की नाही आणि फोटो यासगळ्यांची काहीच गरज नाही. जाती-धर्मासह येणारे अन्य आकस तुम्ही ही सारी माहिती न देऊन टाळू शकतात. फोटो तर अजिबात टाकू नका. ८८ टक्के मुलांचं जॉब रिजेक्शन त्यांच्या सीव्हीतल्या फोटोमुळे होतं.
स्पेलिंग मिस्टेक्स, गचाळ भाषा
२१ ते २५ वयोगटातील मुलं सीव्ही लिहितात, कॉपी, पेस्ट करतात पण त्यातल्या स्पेलिंग मिस्टेक तशाच. स्पेलचेक लावून करेक्शनही करत नाहीत. ५५ टक्के मुलांच्या सीव्हीमधे अत्यंत मुर्खासारख्या चुका असतात.
इतक्या हलगर्जी माणसांना कुणी काय म्हणून नोकरी द्यावी. सो, प्लीज स्पेलिंग मिस्टेक टाळाच.
लामण कशाला?
तुमच्या जॉबसाठी आवश्यक तेवढीच माहिती लिहा.ती ही थोडक्यात. अनाठायी लामण लावू नका. पॉईण्टर्समध्ये कामाचं तेवढं लिहा.
छंदवर्गाची माहिती टाळा.
मला नाणी गोळा करायला आवडतात, मला ना वेगवेगळे दगड गोळा करायला आवडतात. रिडिंग इज माय हॉबी, असला शो ऑफ टाळा. त्यातून पडलंच तर वाईटच इम्प्रेशन पडतं.
नकारघंटा बंद.
स्वत:विषयी लिहिताना पॉझिटिव्ह टोनमध्ये लिहा.कितीही मोठी फिलॉसॉफी झाडायची इच्छा असेल तरी नकारात्मक, उपरोधिक भाषेत काही लिहू नका. सोशल मीडियात सतत निगेटिव्ह लिहिणार्‍यांनाही आता जॉब मिळणं अवघड होतंय.
नो रेफरन्स प्लीज.
अनेकांना फार घाई झालेली असते, रेफरन्स म्हणून दोन माणसांचे नाव-नंबर देऊन टाकायची. मागितले आहेत का? मग देऊ नका, त्यापेक्षा लिहा की, रेफरन्सेस अव्हेलेबल ऑन रिक्वेस्ट’.
रेफरन्स म्हणून ज्यांची नावं द्यायची त्यांची यादी तयार ठेवा, मागितली तर द्या, नाहीतर नाही.
गमजा मारू नका.
स्वत:च्या शिक्षणाविषयी, अनुभवाविषयी, पर्सनल लाईफविषयी खोटी माहिती देऊ नका. नोकरी देताना तुम्ही म्हणताय ते खरंच आहे ना, हे तपासलं जाऊ शकतं.
नो स्किल शो ऑफ
बर्‍याच जणांना आपल्याला खूप काही येतं हे सांगण्याची घाई झालेली असते. ती टाळा. तुम्हाला जे येतं ते थोडक्यात, मुद्देसूद सांगा. बढाचढाके बोलाल तर फस सकते है! त्यात सीव्ही मोठा होतो, एका पानापलीकडे सीव्ही वाचायला कुणाला वेळ नाही, नसतोच.
क्रिएटिव्हीटी टाळाच.
सीव्ही, सिम्पल. सरळ, साध्या टायपात लिहा. अनेकजण इटालिक करतात, फॉण्ट वेगळे वापरतात, अण्डरलाइन करतात, अती बोल्ड लेटर्स वापरतात. कलर्स ओततात. काहीजण हातानं लिहितात. क्लिप आर्ट वापरतात, हे असलं काही करू नका. सरळ, साध्या टायपात सीव्ही असणं गरजेचं.
फंडू भाषा नको.
कट्टय़ावर जी भाषा, जे शब्द वापरतात, ते सीव्हीत लिहू नका. ते कितीही स्टायलिश आणि ट्रेण्डी वाटत असले तरीही ते वापरू नकाच. ७१ टक्के एचआरवाले म्हणतात की, सीव्हीत ‘तसे’ शब्द सर्रास वापरलेले दिसतात.