क्रिकेट महाकुंभाला शानदार सुरुवात

कर्णमधुर संगीताच्या स्वरलहरी..., नयनरम्य लाईट शो..., लोकनृत्याची मेजवानी; तसेच आसमंतात चकाकी आणणा-या भव्य आतषबाजीच्या साक्षीने शनिवारपासून

ख्राईस्टचर्च : कर्णमधुर संगीताच्या स्वरलहरी..., नयनरम्य लाईट शो..., लोकनृत्याची मेजवानी; तसेच आसमंतात चकाकी आणणा-या भव्य आतषबाजीच्या साक्षीने शनिवारपासून (दि. १४) सुरू होत असलेल्या क्रिकेट विश्वचषकाचे गुरुवारी शानदार समारंभात भव्य उद्घाटन पार पडले. १४ संघांदरम्यान दीड महिना रंगणाऱ्या क्रिकेटच्या या महाकुंभाची सुरुवात न्यूझीलंडच्या ख्राईस्टचर्च शहरातील हेग्ले पार्क आणि मेलबोर्नच्या मायर म्युझिक बाऊल येथे एकाचवेळी झाली. तीन तास रंगलेल्या या सोहळ्याला महान खेळाडूंसह हजारो क्रिकेटशौकिनांची उपस्थिती होती. कार्यक्रमाच्या प्रारंभी ‘बॅगपायपर’ची धून वाजविण्यात आली; तर आतषबाजीने सोहळा संपविण्यात आला. ‘माओरी वॉरियर्स’ तसेच ‘मॉरिस डान्सर्स’ या पथकांचे नृत्य सोहळ्याचे आकर्षण ठरले.आॅस्ट्रेलिया-न्यूझीलंड यांच्या संयुक्तविद्यमाने २३ वर्षांनंतर विश्वचषकाचे आयोजन करण्यात आले आहे. फेब्रुवारी २०११ मध्ये या शहराने भूकंपाचे भीषण धक्के अनुभवले होते. त्यात १८५ लोकांना प्राण गमवावे लागले. त्या दुर्दैवी घटनेचे साक्षीदार असलेल्या अनेक आठवणी आजही शिल्लक आहेत. कधीकाळी या ठिकाणी गगनचुंबी इमारती होत्या. आज ओसाड मैदाने आहेत; पण ख्राईस्टचर्चच्या लोकांचे क्रिकेटप्रती असलेले प्रेम तसूभरही कमी झाले नसल्याचा पुरावा देणारा हा सोहळा होता.शहराचे महापौर लीने डॅलझिएल म्हणाले, ‘‘भूकंप झाला त्या वेळी हे शहर २०११ च्या रग्बी विश्वचषकाची तयारी करीत होते. भूकंपामुळे हॉटेल आणि आयोजनस्थळांना फटका बसला. सामन्यांचे आयोजन अन्य स्थळी हलविणे भाग पडले होते. पुन्हा एकदा परत आलो आहोत.’’न्यूझीलंडचे पंतप्रधान जॉन यांनी स्पर्धा सुरू झाल्याची औपचारिक घोषणा केली. ते म्हणाले, ‘‘भूकंपाने ख्राईस्टचर्चकडून रग्बी विश्वचषकाच्या आयोजनाची संधी हिरावून घेतली होती. क्रिकेट विश्वचषकाच्या उद्घाटन सोहळ्याने ही उणीव भरून काढली आहे. या सोहळ्याद्वारे ख्राईस्टचर्च पुन्हा उभे झाले असल्याचा संदेश देण्याची वेळ आली आहे.’’न्यूझीलंड-श्रीलंका यांच्यात शनिवारी उद्घाटनाचा सामना हेग्ले ओव्हलवर खेळला जाईल. त्याच दिवशी मेलबोर्न येथे आॅस्ट्रेलिया-इंग्लंड हा दुसरा सामना होईल. दरम्यान, आंतरराष्ट्रीय क्रिकेट परिषदेचे सीईओ डेव्हिड रिचर्डसन यांच्या हस्ते विश्वचषकाचे अनावरण करण्यात आले. उद्घाटन सोहळ्यासह क्रिकेटशौकिनांचा उत्साह, सहभागी राष्ट्रांच्या संस्कृतीचा उत्सव आणि ख्राईस्टचर्चच्या लोकांची संकटाकडून सौहार्दाकडे वाटचाल सुरू झाली आहे. (वृत्तसंस्था)