चेन्नई-राजस्थान ‘आमने-सामने’

चेन्नई सुपरकिंग्ज आणि तिसर्‍या स्थानावर असलेला राजस्थान रॉयल्स संघांदरम्यान मंगळवारी जेएससीए आंतरराष्ट्रीय स्टेडियममध्ये रंगणार्‍या लढतीच्या निमित्ताने चाहत्यांना रंगतदार खेळ बघण्याची संधी मिळणार

रांची : आयपीएलच्या सातव्या पर्वात दुसर्‍या स्थानावर असलेला चेन्नई सुपरकिंग्ज आणि तिसर्‍या स्थानावर असलेला राजस्थान रॉयल्स संघांदरम्यान मंगळवारी जेएससीए आंतरराष्ट्रीय स्टेडियममध्ये रंगणार्‍या लढतीच्या निमित्ताने चाहत्यांना रंगतदार खेळ बघण्याची संधी मिळणार आहे. महेंद्रसिंग धोनीच्या नेतृत्वाखालील चेन्नई संघाने या स्पर्धेत ९ पैकी ७ सामन्यात विजय मिळविला आहे, तर आॅस्ट्रेलियन अष्टपैलू शेन वॉटसनच्या नेतृत्वाखालील राजस्थान संघाने ९ पैकी ६ सामन्यांत विजयाला गवसणी घातली आहे. अव्वल तीन संघांमध्ये समावेश असलेल्या या दोन संघांची या स्पर्धेतील कामगिरी बघता, मंगळवारी उभय संघांदरम्यान खेळल्या जाणारी लढत रंगतदार होणार असल्याचे निश्चित आहे. धोनी गृहमैदानावर कशी कामगिरी करतो, याबाबत चाहत्यांमध्ये उत्सुकता आहे. रांची चेन्नई संघाचे दुसरे गृहमैदान आहे. चेन्नईमध्ये स्थानिक प्रशासनासोबत एम.ए. चिदंबरम स्टेडियममधील तीन स्टॅण्डबाबत सुरू असलेल्या वादाच्या पार्श्वभूमीवर पूर्वघोषित कार्यक्रमानुसार चेन्नईमध्ये खेळल्या जाणार्‍या लढती आता रांचीमध्ये खेळल्या जाणार आहेत. गृहमैदानावर धोनीपुढे संघाला विजय मिळवून देण्याचे आव्हान आहे. राजस्थान संघ जबरदस्त फॉर्मात आहे. बेंगळुरू विरुद्धच्या लढतीत धक्कादायक विजयाची नोंद केल्यामुळे राजस्थान संघाचे मनोधैर्य उंचावलेले आहे. राजस्थान संघाने रविवारी खेळल्या गेलेल्या लढतीत बेंगळुरू विरुद्ध विशाल लक्ष्याचा यशस्वी पाठलाग केला. राजस्थानच्या फलंदाजांची कामगिरी उल्लेखनीय ठरत आहे. राजस्थान संघात सलमीच्या जोडीपासून आठव्या क्रमांकापर्यंत सामना जिंकून देणार्‍या दर्जेदार फलंदाजांचा समावेश आहे. अजिंक्य रहाणे, करण नायर, शेन वॉटसन, स्टुअर्ट बिन्नी, संजू सॅम्सन, स्टिव्हन स्मिथ आणि जेम्स फॉकनर यांच्यामध्ये संघाला विजय मिळवून देण्याची क्षमता आहे. राजस्थान संघातील सिनिअर लेगस्पिनर प्रवीण तांबे प्रतिस्पर्धी फलंदाजांवर वर्चस्व गाजवण्यास सक्षम आहे. तांबेची या स्पर्धेतील कामगिरी उल्लेखनीय ठरली आहे. राजस्थान संघाला रोखण्यासाठी धोनीच्या नेतृत्वाखालील चेन्नई संघापुढे चमकदार कामगिरी करण्याचे आव्हान आहे. चेन्नई संघाने यापूर्वीच्या लढतीत गतविजेत्या मुंबई इंडियन्स संघावर ४ गडी राखून सरशी साधली होती. चेन्नई संघाचा सलामीवीर ड्वेन स्मिथ चांगल्या फॉर्मात आहे. स्मिथव्यतिरिक्त मॅक्युलम, रैना, फॅफ ड्यूप्लेसिस, धोनी आणि रवींद्र जडेजा यांच्यामध्ये संघाला विजय मिळवून देण्याची क्षमता आहे. (वृत्तसंस्था)