बंगाल वॉरियर्सची विजयाची हॅट्ट्रिक

नितीन तोमारच्या निर्णायक चढायांच्या जोरावर यजमान बंगाल वॉरियर्सने झुंजार पुणेरी पलटनला ३३-२८ असे नमवून प्रो- कबड्डीत सलग तिसरा विजय नोंदवला

रोहित नाईक, कोलकातानितीन तोमारच्या निर्णायक चढायांच्या जोरावर यजमान बंगाल वॉरियर्सने झुंजार पुणेरी पलटनला ३३-२८ असे नमवून प्रो- कबड्डीत सलग तिसरा विजय नोंदवला. यासह बंगालने घरच्या मैदानावर विजयी सलामी दिली. पुण्याचा तीन सामन्यांतून हा दुसरा पराभव ठरला.नेताजी सुभाषचंद्र बोस स्टेडियममध्ये झालेल्या या सामन्याच्या पहिल्या सत्रात पुणेकारांचे वर्चस्व राहिले. जँग कून लीने बोनस गुणाद्वारे सामन्यातील पहिला गुण नोंदवताना यजमानांचे खाते उघडले. मध्यंतराला पुण्याने ११-१० अशी एका गुणाची नाममात्र आघाडी घेतली. कर्णधार मनजित चिल्लरने अप्रतिम सुपर टॅकल करताना पुण्यावरील लोणचे संकट तब्बल तीन वेळा दूर केले.दुसऱ्या सत्रात मात्र यजमानांनी तुफान आक्रमण करत २२व्या मिनिटाला पुण्यावर लोण चढवला. ३०व्या मिनिटाला पुन्हा एकदा लोणचे संकट असताना चिल्लरने भन्नाट सुपर रेड करून पुण्याला २४-२२ आघाडीवर नेले. मात्र बंगालच्या नितीन तोमारने निर्णायक चढाई करताना यजमानांना बरोबरी साधून दिली आणि त्यानंतर ३७व्या मिनिटाला चिल्लर, दीपक हुडा व जसमीर सिंग यांना बाद करून बंगालच्या विजयावर शिक्कामोर्तब केले. तोमारने एकूण ११ गुणांची वसुली केली. पुण्याकडून चिल्लरने १३ गुण मिळवत एकाकी झुंज दिली.