नवीन पनवेलमध्ये अनधिकृत डंपिंग ग्राउंड

नवीन पनवेल मध्ये कचऱ्याची समस्या नवीन नाही. अनेक वेळा कचऱ्याच्या प्रश्नावरून येथील रहिवाशांना आंदोलन करावे लागले आहे.

पनवेल : नवीन पनवेल मध्ये कचऱ्याची समस्या नवीन नाही. अनेक वेळा कचऱ्याच्या प्रश्नावरून येथील रहिवाशांना आंदोलन करावे लागले आहे. नवीन पनवेल सेक्टर ६ ला सिडकोने डम्पिंग ग्राउंड बनवल्याने येथील नागरिकांचा आरोग्याचा प्रश्न निर्माण झाला आहे. या परिसरात राहणाऱ्या नागरिकांमध्ये डेंग्यू आणि मलेरियासारख्या आजाराची लागण होण्याची दाट शक्यता यामुळे निर्माण झाली आहे. कचऱ्यामुळे येथे डासांची मोठ्या प्रमाणात पैदास होत असल्याने या ठिकाणच्या रु ग्णांमध्ये भरच पडत आहे. सिडकोच नव्हे तर आजूबाजूला असलेल्या सुकापूर, विचुंबा, आदई या ग्रामपंचायतीसुध्दा या ठिकाणी कचरा आणून टाकत आहेत. त्यामुळे या परिसरात अनधिकृत डम्पिंग ग्राउंड तयार होत आहे. सिडकोच्या या भूमिकेमुळे स्वच्छ भारत सुंदर भारत मोहिमेला तडा जात आहे. या ठिकाणच्या बिल्डिंगमधील रहिवाशांचा याला तीव्र विरोध असून, त्यांनी नगरसेवक समीर ठाकूर यांची भेट घेऊन कचऱ्याची समस्या मांडली. नागरिकांच्या आरोग्याचा प्रश्न लक्षात घेऊन नगरसेवक समीर ठाकूर यांनी त्वरित या ठिकाणची पाहणी करून सिडको अधिकाऱ्याकडे याबाबत तक्रार केली आहे. परिसरातील कचरा उचलण्यासाठी सिडकोतर्फे ठेकेदार नेमला आहे. मात्र त्याने सिडको परिसरातील कचरा उचलणे आवश्यक आहे. असे असताना आजूबाजूच्या ग्रामपंचायतीसुध्दा या ठिकाणी कचरा आणून टाकत आहेत. या कचऱ्याचा पैसासुध्दा ठेकेदार वसूल करीत असल्याचा आरोप नगरसेवक समीर ठाकूर यांनी केला आहे.