दासगाव : मुंबई-गोवा महामार्गावर वहूर गावचे हद्दीत शनिवारी रात्री १०.४५च्या दरम्यान भरधाव वेगाने जाणाऱ्या ट्रकने एका कारला मागून जोराची धडक दिली. या अपघातात कारमधील दोन प्रवासी जखमी झाले. अपघातानंतर ट्रकचालक ट्रक तिथेच टाकून पळून गेला.मुंबईहून देवगडकडे जाणारी मोबेलो कार क्र. एमएच ०४ जीडी ९७२० ही वहूर गावचे हद्दीत आल्यानंतर त्याच दिशेला जाणारा वाळूने भरलेला ट्रक क्र. एमएच ०८ एम २५२५ भरधाव वेगाने येऊन मोबेलो कारला मागून जोराची धडक दिली. अपघातामध्ये कारमधील भारगाव नंदकुमार राणे व त्यांनी पत्नी सरिता राणे रा. मुलुंड ठाणे दोघेही प्रवासी जखमी झाले. या दोघांना उपचारासाठी महाड ग्रामीण रुग्णालयात दाखल करण्यात आले. मात्र, अपघातानंतर ट्रकचालक पसार झाला. ही घटना शनिवारी रात्री १०.४५ वाजण्याच्या दरम्यान घडली. अपघाताची नोंद महाड शहर पोलीस ठाण्यात दाखल झाली आहे. (वार्ताहर)
ट्रकची कारला धडक; दोघे जखमी
By admin | Updated: November 14, 2016 04:31 IST