वसुली बाबूचे गांजा विक्रेत्यांना अभय

अमली पदार्थविरोधी पथकाच्या धडक कारवाईनंतरही गांजा व इतर अमली पदार्थांची विक्री पूर्णपणे बंद होवू शकली नाही. पोलीस दलामधील काही घरभेद्यांमुळेच अवैध

- नामदेव मोरे, नवी मुंबई अमली पदार्थविरोधी पथकाच्या धडक कारवाईनंतरही गांजा व इतर अमली पदार्थांची विक्री पूर्णपणे बंद होवू शकली नाही. पोलीस दलामधील काही घरभेद्यांमुळेच अवैध व्यवसाय बिनधास्तपणे सुरू आहेत. परिमंडळ एकमध्ये बेलापूर ते दिघापर्यंत गांजा, गुटखा व इतर अवैध व्यावसायिकांकडून बाबू वसुली करत असल्याची चर्चा आहे. या वसुली बाबूविषयी पोलीस महासंचालकांपासून मुख्यमंत्र्यांकडे तक्रार केली जाणार आहे. ‘लोकमत’ने स्टिंग आॅपरेशन करून शहरातील अनेक गांजा विक्री केंद्रांचे वास्तव समोर आणल्यानंतर अमली पदार्थ विरोधी पथकाने धाडसत्र सुरू केले आहे. गांजा, एमडी व इतर अमली पदार्थांची विक्री करणाऱ्या २५ पेक्षा जास्त माफियांना गजाआड केले आहे. हरिदास विधाते ऊर्फ टारझन, अशोक पांडे यांच्यासह अनेक माफिया गजाआड गेले आहेत. पण यानंतरही गांजा विक्री कमी झालेली नाही. टारझन व त्याचा मुलगा तुरुंगात गेल्यानंतर भाजी मार्केटमधील त्याच्या अड्ड्यांवर विकी नावाच्या विक्रेत्याची मुले गांजा विकत आहेत. धान्य मार्केटजवळील झोपडपट्टीमधील लालीचा अड्डा अद्याप एकही दिवस बंद झाला नाही. महापालिका व सिडकोने झोपड्या हटविल्या तरी दुसऱ्याच दिवशी पुन्हा तिथे गांजा विकला जात आहे. राजा घासवाल्याचा फळ मार्केट व इंदिरानगरमधील अड्डा बंद झाला तरी हनुमाननगर व आंबेडकर नगरमध्ये गांजा विक्री सुरूच आहे. के के आर रोडवर लंगडा अशोक बाबाचा मृत्यू झाल्यानंतर तेथे विकीने गांजा विक्री सुरू केली आहे. तुर्भे महापे रोडवर वारलीपाडा येथे झोपडीमध्ये एक महिला गांजा विकत आहे. नेरूळमधील बालाजी मंदिराच्या पायथ्याशीही अमली पदार्थांची विक्री सुरू आहे. याशिवाय मुकुंद कंपनीजवळही गांजा विक्री होत आहे. शहरात अमली पदार्थांसह मोठ्या प्रमाणात गुटखा विक्रीही होत आहे. गुजरातवरून भाजीच्या गाडीतून गुटखा एपीएमसी परिसरात आणला जातो. तेथून तो नवी मुंबईत सर्व पानटपऱ्यांना पुरविला जात आहे. ‘लोकमत’ने पानटपरीचालकांना व गांजा विक्री करणाऱ्यांना याविषयी विचारणा केली असता धक्कादायक गोष्ट समोर आली आहे. अनेक विक्रेत्यांनी साहेब हा धंदा पोलिसांच्या मर्जीशिवाय चालवताच येत नाही. महिन्याला त्यांचा वाटा द्यावाच लागतो. याशिवाय अनेक वेळा इतर कारणांसाठीही वसुली केली जाते. एपीएमसी, तुर्भे व इतर काही ठिकाणी कोणाला पैसे द्यावे लागतात याविषयी विचारणा केल्यानंतर क्राइमवाला बाबू आमच्याकडून पैसे घेत असल्याचे सांगण्यात आले. सर्व अड्ड्यांची माहिती त्याला आहे. नवीन कुठे कोणी काही सुरू केले तरी त्याला सर्व तपशील मिळत असतो. अनेक वर्षांपासून त्याच्याकडेच वाटा दिला जात असल्याचे सांगण्यात आले. वसुली बाबूचे व इतर अनेक वसुली एजंटचे मोबाइल संभाषण तपासले तरी सर्व ठिकाणची माहिती समोर येईल, असे सांगितले जात आहे. हमारा सर फिरेला नही गुटखा व गांजा विक्रेत्यांशी ग्राहक म्हणून चर्चा केली असता परिमंडळ एकमध्ये बाबू वसुली करत असल्याचे सांगितले. यावर काहीही सांगू नका, पोलीस असे कसे करतील. डोके फिरल्यागत सांगू नका असे बोलल्यानंतर काहींनी साहेब हमारा सर फिरेला नही असे सांगितले. हा व्यवसाय चोरीचा असला तरी तो चोरून व पोलिसांच्या नजरा चुकवून करता येत नसल्याचेही अनेकांनी मत व्यक्त केले आहे. आयुक्तांसह पोलीस महासंचालकांकडे तक्रारवसुली बाबूचा संचार सीबीडी ते दिघापर्यंत आहे. प्रत्येक टपरी, गांजा विक्रीचा अड्डा याची माहिती त्याला आहे. ठरलेला वाटा त्याला द्यावाच लागत आहे. त्याचा मोबाइल नंबर व माहिती पोलीस आयुक्तांसह पोलीस महासंचालकांना देण्यात येणार असून त्याचीही सखोल चौकशी व्हावी, अशी मागणी केली जाणार असल्याची माहिती काही जणांनी नाव न सांगण्याच्या अटीवर दिली. पोलिसांसह मनपाचेही दुर्लक्ष एपीएमसीमधील बहुतांश सर्व पानटपऱ्यांवर गुटखा विक्री भाजी मार्केट, आंबेडकर नगर, नेरूळ, तुर्भे स्टोअर्समध्ये गांजा विक्री बीट मार्शल व इतर पोलिसांना माहिती असूनही कारवाई नाहीप्रत्येक बार व हॉटेलबाहेर अनधिकृत पानटपरीमाहिती असूनही कारवाई होत नसल्याबद्दल नागरिकांची नाराजी