वसई विधानसभा मतदारसंघात पंचरंगी लढत

वसई विधानसभा मतदारसंघात सेनेच्या काही ज्येष्ठ नेत्यांनी उमेदवारी मागीतली असून नुकतीच त्यांची मुलाखतही पार पडली.

दिपक मोहिते, वसईवसई विधानसभा मतदारसंघात सेनेच्या काही ज्येष्ठ नेत्यांनी उमेदवारी मागीतली असून नुकतीच त्यांची मुलाखतही पार पडली. अपक्ष उमेदवार विवेक पंडीत यांनी यावेळीही सेनेचे चिन्ह न घेतल्यास शिवसेनेचा उमेदवार रिंगणात येण्याची शक्यता आहे. सेनेचे मदन किणी व विवेक पाटील या दोघांनी निवडणुक लढवण्याची इच्छा व्यक्त केली आहे. पंडीत यांनी धनुष्यबाणाऐवजी पुर्वीचेच बॅट हे चिन्ह घेतल्यास येथील लढत पंचरंगी होण्याची शक्यता आहे. पंडीत यांनी सेनेच्या चिन्हावर निवडणुक लढवावी अशी तमाम शिवसैनिकांची इच्छा आहे. या इच्छेला मान देऊन पंडीत सेनेच्या तिकिटावर उभे राहतात की पुन्हा अपक्ष म्हणून निवडणुक लढवतात याकडे सर्वांचे लक्ष लागले आहे. सेनेचे ज्येष्ठ नेते मदन किणी यांनी सन १९९० मध्ये त्यावेळी काँग्रेसमध्ये असलेल्या हितेंद्र ठाकूर यांच्याशी दोन हात केले होते. गेली अनेक वर्षे शिवसेनेत कार्यरत असलेले मदन किणी मध्यंतरी हितेंद्र ठाकूर यांच्या बहुजन विकास आघाडीत दाखल झाले होते. परंतु त्यांना कोणतेही महत्वाचे पद न मिळाल्यामुळे दिड वर्षापुर्वी पुन्हा ते सेनेत परतले. या निवडणुकीमध्ये त्यांनी सेनेकडून तिकिट मागीतले आहे. तर दुसरीकडे सेनेचे माजी तालुका प्रमुख विवेक पाटील यांनीही उमेदवारी लढवण्याची इच्छा व्यक्त केली आहे. या दोघांनी काही दिवसापुर्वी सेना नेत्यांची भेट घेतली. विवेक पंडीत हे सेनेच्या चिन्हावर निवडणुक लढवण्यास तयार झाल्यास हे दोघेही माघार घेतील असा अंदाज व्यक्त होत आहे.नालासोपारा विधानसभा मतदारसंघात बहुजन विकास आघाडी वगळता इतर कोणत्याही पक्षाचा प्रचार अद्याप सुरू झालेला नाही. ही जागा सेनेकडे आहे परंतु सेनेच्या एका ज्येष्ठ पदाधिकाऱ्याचे नाव नुकत्याच घडलेल्या एका प्रकरणात आल्यामुळे सेनेकडे सक्षम उमेदवाराची कमतरता आहे. तर दुसरीकडे भाजपनेही या जागेसाठी जोरदार प्रयत्न चालवले आहेत. आजमितीस भाजपकडे आर्थिकदृष्ट्या संपन्न असलेला उमेदवार आहे व त्याची जनमानसात प्रतिमाही चांगली आहे. त्यामुळे राष्ट्रीय स्वयंसेवक संघ ही जागा भाजपला मिळावी याकरीता प्रयत्नशील आहे. जागेसंदर्भातील वाद जोवर मिटत नाही तोवर महायुतीचा उमेदवार कोण? ही चर्चा रंगतच राहणार. या मतदारसंघात बहुजन विकास आघाडीने गेल्या आठवड्यापासून जोरदार प्रचारास सुरूवात केली आहे. नालासोपारा विधानसभा मतदारसंघात सर्वाधिक मतदार आहेत. गेल्या वेळी बहुजन विकास आघाडीचे क्षितीज ठाकूर यांनी सेनेच्या शिरिष चव्हाण यांचा प्रचंड मतांनी पराभव केला. यंदा शिरीष चव्हाण यांच्याजागी नवीन चेहरा देण्याचा सेनेचा प्रयत्न आहे. भाजपने मागीतलेल्या १५० जागांमध्ये या मतदारसंघाचा समावेश आहे. वास्तविक पालघर जिल्ह्णातील डहाणू व नालासोपारा या दोन मतदारसंघावर भाजपने दावा केला होता. परंतु डहाणूवरचा दावा त्यांनी आता सोडला आहे.गेल्या १० वर्षात नालासोपारा मतदारसंघात प्रचंड प्रमाणात लोकसंख्या वाढली. त्या तुलनेत नागरीसुविधा उपलब्ध करणे हे महानगरपालिकेसमोर आव्हान ठरले. या आव्हानास महानगरपालिका यशस्वीरित्या सामोरे गेली.