ऑनलाइन लोकमत
नवी दिल्ली, दि. 10 - कुणा दुस-याची पत्नी बनलेल्या प्रेयसीला परत मिळवण्यासाठ प्रियकराने फिजीयोथेरपीस्टच्या मदतीने तिच्या पतीची हत्या घडवून आणली. एखाद्या हेरगिरी चित्रपटातील दृश्याप्रमाणे भर रस्त्यात विषारी इंजेक्शन टोचून ही हत्या झाल्याने दिल्लीच्या सदर बाजारात शनिवारी एकच खळबळ उडाली. कोटक महिंद्रा बँकेत कॅशियर असलेले रवी कुमार (27) आपले काम संपवून घराच्या दिशेने चालले होते.
संध्याकाळी 7.15 च्या सुमारास ते सदर बाजारातील चित्रपटगृहाजवळ येताच गळयाला काहीतरी टोचल्यासारखे वाटले. म्हणून त्यांनी गळयाला हात लावला तर, त्यांच्या हाताला रक्त लागले. अचानक रक्त कसे आले म्हणून मागे वळातच ते काही सेकंदात खाली कोसळले. खाली पडताना त्यांनी मानेवर टोचणी मारणा-या मागे उभ्या असलेल्या व्यक्तीला पकडले.
तिथे असणारे प्रत्यक्षदर्शी लगेचच त्यांच्या मदतीला धावले व त्यांनी संशयित प्रेमला पोलिसांच्या ताब्यात दिले. प्रेम फिजियोथेरपीस्ट असून त्याच्या चौकशीतून मुख्य आरोपी अनिश यादवचे नाव समोर आले. रवी कुमार यांना रुग्णालयात दाखल करण्यात आले. पण रविवारी सकाळी त्यांचा मृत्यू झाला.
अनिशचे ज्या मुलीवर प्रेम होते तिचे रवी कुमार यांच्याबरोबर लग्न झाले होते. अनिश आणि रवी कुमार यांची पत्नी एकाच कॉलेजमध्ये होती. अनिशने अनेकदा लग्नाचा प्रस्तावर देऊनही तिने रवी कुमार यांच्याबरोबर संसार थाटला. रवी कुमार यांना हटवल्यानंतर त्यांची पत्नी प्रेयसी बनून पुन्हा आपल्या आयुष्यात येईल म्हणून अनिशने प्रेमला साथीला घेऊन हा सारा कट रचला.
कुठल्याही कचाटयाच सापडू नये यासाठी अनिशने इंटरनेटवर सर्च करुन हा प्लान बनवला होता. ब्रिटन आणि जर्मनीमध्ये अशा पद्धतीने रस्त्यात चालत असताना दोन हत्या झाल्या होत्या. ज्यामध्ये अद्याप आरोपी सापडलेले नाहीत. अनिशने या हत्येसाठी प्रेमला दीड लाख रुपये दिले होते. फिजीयोथेरपीस्ट असल्याने प्रेमला विषारी औषधांचा अभ्यास होता. त्याने रुग्णालयातून ही औषधे चोरल्याचे पोलिसांना सांगितले.