ऑनलाइन लोकमत -
विल्लूपुरम (तामिळनाडू), दि. 12 - आपल्या पत्नीला भेटण्यासाठी एका व्यक्तीने जोरदार शक्कल लढवली , पण त्याचा खेळ त्याच्यावरच उटलला. पत्नीला भेटण्यासाठी चक्क महिलेचा वेश घेऊन गेलेल्या पतीला लोकांनी चोर समजून जोरदार चोप दिला. शेखर असं या व्यक्तीचं नाव असून जयम कोंडम परिसरात ते राहतात. सिंगापूरमधील आपली नोकरी सोडून ते परत भारतात आले होते. पण त्यामुळे त्यांची सासू नाराज झाली आणि आपली मुलगी इंदिराला आपल्यासोबत घेऊन गेली.
इंदिरा गेल्या दोन महिन्यांपासून आपल्या आईसोबत राहत आहे. शेखर यांना आपली पत्नी इंदिराला भेटण्याची तीव्र इच्छा झाली होती. ओळख लपवण्यासाठी शेखर यांनी मुलींचा पंजाबी ड्रेस घातला आणि ओढणीने चेहरा झाकून घेतला. अशाप्रकारे वेश बदलून शेखर आपल्या पत्नीला भेटण्यासाठी गेले. सासरी घरापासून थोड्या अंतरावर त्यांची पत्नीशी भेटदेखील झाली.
शेखर आणि इंदिरा एकत्र फिरत असताना काही स्थानिकांना शंका आली. कारण शेखरने महिलेचा वेश केला असला तरी चप्पल मात्र पुरुषांचीच घातली होती. लोकांना लहान मुलांचं अपहरण करणारी व्यक्ती असल्याचा संशय आला. आणि मग लोकांनी हल्ला चढवत शेखरची जोरदार धुलाई केली. शेखरने लोकांना शेवटी सगळं खरं सांगितलं तेव्हा लोकांची खात्री पटली.
या परिसरात एका लहान मुलाचं अपहरण झालं होतं. त्यामुळे कोणी संशयित व्यक्ती दिसली की स्थानिकांना शंका येते. स्थानिकांनी शेखरला पोलिसांच्या हवाली केलं होतं. पोलिसांनी समज देऊन शेखरला सोडून दिलं.