ऑनलाइन लोकमत
मुरादाबाद, (उत्तरप्रदेश )दि. ७ - तास न तास मोबाईल बोलणा-या बहिणीची भावाने रागाच्या भरात हत्या केल्याचे उत्तरप्रदेशातील मुरादाबाद येथे उघड झाले आहे.
मुरादाबाद येथील रुक्साना (नाव बदलले आहे )या १८ वर्षीय युवतीची तिचा भाऊ अस्लम याने हत्या केल्याचे उघड झाले आहे. पोलिसांनी दिलेल्या माहितीनूसार, रुक्साना ही मुरादाबादमधील लकडी फजलपूर या गावात आपल्या वडिलांसोबत राहते. तिचा मोठा भाऊ अस्लम हा कामानिमित्त दिल्लीला राहतो. परंतू शुक्रवारी ईद सण साजरा करण्यासाठी गावाकडे आला. बहिण रुक्साना ही कोणासोबत तरी तास न तास बोलत असल्याचे अस्लमच्या लक्षात आल्याने तिला याबाबत वडिल व अस्लमने जाब विचारला. तिला मारहाण करण्यात आली मात्र याबाबत काहीही सांगण्यास रुक्सानाने नकार दिला. उलट घरातील दरवाजा बंद करून ती फोनवर कोणाशी तरी बोलत राहिल्याने अस्लमचा रागाचा पारा चढला. या रागाच्या भरातच अस्लमने रुक्सानाची हत्या केली. रुक्साना हिचा डिसेंबर महिन्यात विवाह होणार होता अशी माहिती गावक-यांनी दिली असून आरोपीनी हत्या केल्याची कबूली दिल्याची माहिती पोलिसांनी दिली.