ऑनलाइन लोकमत -
नवी दिल्ली, दि. २१ - दक्षिण दिल्लीमधील ग्रीन पार्क मेट्रो स्टेशनबाहेर एका विकृत व्यक्तीने 3 भटक्या कुत्र्यांची हत्या केल्याची धक्कादायक घटना घडली आहे. यामध्ये एका पिल्लाचादेखील समावेश आहे. हा सर्व धक्कादायक प्रकार सीसीटीव्ही कॅमे-यात कैद झाला आहे. पोलिसांनी गुन्हा नोंद केला असून या व्यक्तीचा तपास करत आहेत.
मेट्रो स्टेशनच्या बाहेर 3 कुत्र्यांचा मृतदेह रक्ताच्या थारोळ्यात पडले असल्याचा कॉल पोलिसांना 15 मार्चला आला होता. पोलिसांना घटनास्थळी एका पिल्लाचा मृतदेहदेखील सापडला असल्याची माहिती पोलिसांनी दिली आहे.
हा सर्व प्रकार सीसीटीव्हीमध्ये कैद झाला आहे. या व्हिडिओमध्ये एक तरुण याठिकाणी येतो आणि अचानकपणे कुत्र्यांवर हल्ला करतो. हा सर्व प्रकार 18 मिनिटांत होतो. 3 कुत्र्यांची हत्या करुन झाल्यानंतर पिल्लाला टाकून देऊन तो निघून जाताना दिसत आहे.
पोलीस ठाण्यात गुन्हा नोंद करण्यात आला आहे. मात्र या व्यक्तीची ओळख अजून पटलेली नाही. स्थानिकांनी याअगोदरही अशाप्रकारच्या घटना घडल्याची माहिती पोलिसांना दिली आहे. पोलीस सर्व ठिकाणचे सीसीटीव्ही तपासत असून या सर्व प्रकारात हीच व्यक्ती सामील आहे का ? याचा तपास करत आहे. आरोपीला पकडण्यासाठी पोलिसांनी विशेष पथक तयार केलं आहे. दरम्यान या आरोपीची ओळख पटवून देणा-यास एका एनजीओने 1 लाखांचं बक्षीस जाहीर केलं आहे.