पोलिसांचे वाहन उडवण्याचा प्रयत्न वाळूतस्करांची मुजोरी : सहा जणांविरूद्ध गुन्हा

राहुरी (अहमदनगर) : महसूल अधिकार्‍यांसह पोलिसांना वाळू तस्करीची डोकेदुखी ठरत असताना वाळू तस्करांची मजल थेट पोलिसांना मारण्यापर्यंत गेली आहे.
शेवगावला वाळू तस्करीतून पोलिसाची हत्या झाल्याची घटना ताजी असतानाच शनिवारी तस्करांनी पोलिसांच्या गाडीवर डंपर घालून जीवे मारण्याचा प्रयत्न केला. याप्रकरणी तीन वाहनांसह तीस लाखांचा ऐवज जप्त केला आहे. राहुरी पोलिसांत सहा जणांविरूद्ध गुन्हा दाखल झाला आहे.
पोलीस उपअधीक्षक प्रांजली सोनवणे यांच्यासह १२ जणांच्या पथकाने शनिवारी पहाटे राहुरी-वांबोरी रस्त्यावर दोनच्या सुमारास वाळू घेऊन जाणार्‍या एका डंपरला अडवण्याचा प्रयत्न केला. तेव्हा चालक जगन्नाथ बर्डे याने डंपर थेट पोलिसांच्या गाडीवरच घातले. सुदैवाने यात सर्व पोलीस बचावले. वाळू चोरांची मुजोरी एवढ्यावरच थांबली नाही तर त्यांनी त्यांच्या सहकार्‍यांना बोलावून पोलीस पथकावर दहशत निर्माण करण्याचा प्रयत्न केला. परंतु पोलिसी खाक्यानंतर तस्करांनी धूम ठोकली. (प्रतिनिधी)
------------