नगरसेवकांचे बंड काही तासातच शमले

जळगाव : महसूल मंत्री एकनाथराव खडसे यांच्या समर्थनार्थ महापालिकेतील १७ नगरसेवकांनी पुकारलेले राजीनामा नाट्य अवघ्या तीन तासात मागे घेण्यात आले.
महापालिकेतील विरोधी पक्षनेते वामनराव खडके यांच्या नेतृत्वाखाली पक्षाचे १६ नगरसेवक दुपारी ३ वाजता अजिंठा विश्रागृहात एकत्र आले होते. पक्षाने महसूल तथा पालकमंत्री एकनाथराव खडसे यांची पूर्ण पाठराखण करावी. याप्रश्नी अन्य नेते मौन पाळून आहेत. म्हणून हे नगरसेवक २ रोजी प्रदेशाध्यक्ष रावसाहेब दानवे यांना मुंबईत भेटणार होते व त्यांच्याकडे आपल्या पदाचा राजीनामा देणार होते. मात्र दुपारी पालकमंत्री एकनाथराव खडसे हे जळगावी आल्यानंतर त्यांनी असे प्रकार करू नयेत असे सांगितल्यानंतर हे बंड अवघ्या तीन तासात संपले व मुंबईला जाण्याचा निर्णयही या सदस्यांनी रद्द केला.