ऑनलाइन लोकमत
ग्रेटर नोएडा, दि. 27 - नोएडा इंटरनॅशनल युनिव्हर्सिटीमध्ये दुस-या वर्षाला शिकणा-या विद्यार्थिनीने मित्रावरच बलात्काराचा आरोप केला आहे. लिफ्ट देण्याच्या बहाण्याने मित्राने त्याच्या एसयूव्ही कारमध्ये बसवले व कार निर्जन स्थळी थांबवून आपल्यावर बलात्कार केला असे पीडित तरुणीने तक्रारीत म्हटले आहे. आरोपी तरुण बीटेक पदवीधर असून तो ग्रेटर नोएडाच्या मुरशादपूर येथे राहतो.
बहिणीला कॉलेजमध्ये सोडण्यासाठी आरोपी तरुण नोएडा युनिव्हर्सिटीमध्ये यायचा. त्यावेळी त्याची पीडित तरुणीबरोबर ओळख झाली होती. ओळखीचे रुपांतर पुढे मैत्रीमध्ये झाले. फेसबुक अकाऊंटवर दोघेही परस्परांच्या फ्रेंडस लिस्टमध्ये होते. पीडित तरुणी मंगळवारी दुपारी 12.30च्या सुमारास यमुना एक्सप्रेसवेवरील एनआययू गेटच्या प्रवेशव्दारावर बसची वाट पाहत उभी होती.
त्यावेळी आरोपी त्याची एसयूव्ही कार घेऊन तिथे आला. त्याने तरुणीला बसस्टॉपवर सोडतो असे सांगितले. तरुणी जिथे उभी होती तिथून बसस्टॉप एक किलोमीटरच्या अंतरावर होता. आरोपीला ओळखत असल्याने तरुणी त्याच्या गाडीमध्ये बसली. पण त्याने गाडी बस स्टॉपऐवजी फॉर्म्युला वन रेस ट्रॅकच्या निर्जन परिसरात थांबवली. त्याने तरुणीला त्याच्यासोबत मागच्या सीटवर येऊन बसण्यास सांगितले. गाडीच्या स्टेअरिंग व्हीलवर आरोपीचा मित्र बसला होता असे तरुणीने सांगितले. या तरुणीने आरोपीला रोखण्याचा प्रयत्न केला तिने 100 नंबरवर डायल केला. पण आरोपीने तिच्या हातातून मोबाईल खेचून घेतला.
निर्जन ठिकाणी गाडी थांबवल्यानंतर त्याने मित्राला गाडीतून बाहेर जाण्यास सांगितले. आरोपीने गाडीच्या सर्व काचा आणि दरवाजे बंद करुन म्युझिकचा आवाज वाढवला आणि माझ्यावर बलात्कार केला असे पीडीत तरुणीने तक्रारीत म्हटले आहे. बलात्कारानंतर त्याने तरुणीला बसस्टॉपजवळ नेऊन सोडले व तिथून निघून गेला.