ऑनलाइन लोकमत
पाटणा, दि. ५ - अभिनेता अजय देवगणच्या 'दृश्यम' या सुपरहिट चित्रपटातून प्रेरणा घेऊन बिहारमधील एका ३८ वर्षीय इसमाने खुनाचे सर्व पुरावे नष्ट केल्याची धक्कादायक घटना उघडकीस आली आहे. बिहारमधील वैशाली येथील रहिवासी असलेल्या रजनीश सिंगला पोलिसांनी हत्येच्या एका आठवड्यानंतर अटक केली. लग्नाचा तगादा लावल्याप्रकरणी आपण सृष्टी या तरूणीचा खून करत ' दृष्यम' चित्रपटात दाखवल्याप्रमाणे सर्व पुरावे नष्ट केल्याची कबुली रजनीशने पोलिसांसमोर दिली.
रजनीश हा आधीच विवाहीत असून त्याला दोन मुलेही आहेत, मात्र त्याला एका मॉडर्न मुलीसोबत लग्न करून दिल्लीत स्थायिक व्हायची इच्छा होती. त्यासाठीच त्याने एका मॅट्रीमोनिअल साईटवर एक उच्चभ्रू व्यक्ती म्हणून नाव नोंदवले. तेथेच त्याची ओळख सृष्टी या तरूणीशी झाली आणि ती त्याला भेटण्यासाठी पाटणा येथे आली. मात्र भेट झाल्यानंतर सृष्टीने त्याला नकार दिल्याने दोघांमध्येही कडाक्याचा वाद झाला. त्यानंतर ती घरी परत जाण्यासाठी रेल्वे स्थानकाकडे जात असतानाच रागावलेल्या रजनीशने त्याच्या भावासह तिला गाठले आणि तिची हत्या केली.
मात्र या हत्येचा कोणालाच सुगावा लागू नये यासाठी त्याने 'दृश्यम' चित्रपटात दाखवल्याप्रमाणेच सर्व पुरावे नष्ट केले. मोबाईल लोकेशनद्वारे पोलीस आपला माग काढू शकतील हे लक्षात आल्याने रजनीशने रस्त्यावरील एका ट्रकमध्ये त्याचा फोन फेकून दिला. तसेच एका मच्छिमाराकडून बोट भाड्याने घेतली व आपली रॉयल एनफिल्ड मोटरसायकलही नदीत फेकून दिली.
मात्र एवढ्या सर्व प्रयत्नानंतरही पोलिसांनी त्याचा शोध लावत त्यालाच अटक केलीच. पोलिसांकडे हत्येचा कबुलीजबाब देताना रजनीशच्या चेह-यावर पश्चातापाचा लवलेशही नव्हता.