घरगुती व कृषी पंपांना नवीन वीजजोडणी

चंद्रशेखर बावनकुळे : मुळा-प्रवरा वीज संस्थेबाबत लवकरच तोडगा
शिर्डी : राज्यात महावितरणाच्या माध्यमातून २५ हजार कोटी रुपये खर्च करून पायाभूत सुविधा निर्माण करण्यात येणार असून त्याद्वारे एका महिन्यात घरगुती आणि कृषी पंपांना वीजजोडणी देण्यात येतील़, अशी माहिती ऊर्जामंत्री चंद्रशेखर बावनकुळे यांनी दिली़ नगर जिल्ह्यातील मुळा-प्रवरा वीज संस्थेबाबत लवकरच तोडगा काढू, असे आश्वासनही त्यांनी दिले़
चंद्रशेखर बावनकुळे यांनी गुरुवारी जिल्ह्यातील विज समस्येबाबत लोकप्रतिनिधी आणि अधिकारी यांची शिर्डी येथे बैठक घेतली़ यावेळी विरोधीपक्ष नेते राधाकृष्ण विखे व स्थानिक आमदार उपस्थित होते. बावनकुळे म्हणाले की, राज्यातील प्रत्येक विधानसभा कार्यक्षेत्रात आमदारांच्या अध्यक्षतेखाली महावितरणाच्या अधिकार्‍यांची एक समिती स्थापन करून वीज वितरणासह विजेसंदर्भात अन्य समस्यांचे निराकरण करण्याचा अधिकार या समितीला देण्यात येणार आहे़ तसेच प्रत्येक फिडरवर आऊट सोर्सिंगद्वारे सहा मुलांची नेमणूक करून वीज बिले वितरण, वसुली आणि विजेसंबंधी तक्रारी तात्काळ सोडविणार असल्याचे त्यांनी स्पष्ट केले़
आपल्या राज्याच्या वीज निर्मितीप्रकल्पासाठी छत्तीसगड राज्यातून कोळसा आणण्यासाठी वाहतूक खर्च मोठा आहे़ त्यामुळे वीजदर वाढला जातो़ त्यावर पर्याय म्हणून छत्तीसगडमध्येच वीजनिर्मिती प्रकल्प सुरू करण्याबाबत तेथील राज्य सरकारशी चर्चा सुरू असल्याचे त्यांनी सांगितले़
पुढील दोन वर्षांत वीजेचा दर कमी करून राज्यातील ११ कोटी जनतेला सरकार दिलासा देणार आहे़ जपान आणि जर्मनीच्या धरतीवर राज्यात अतिजलद ४०० केव्हीए विद्युत वाहिनीसाठी सिंगल पोल उभारून शेतकर्‍यांचे होणारे नुकसान टाळण्यासाठी ऊर्जा विभाग लवकरच निर्णय घेणार आहे़
़़़़़़़़़़़़़
शेतकर्‍यांकडे दहा हजार कोटीची थकबाकी
राज्यातील शेतकर्‍यांकडे दहा हजार कोटींची थकबाकी असून कृषी संजीवनी योजनेचा लाभ शेतकर्‍यांनी घ्यावा़ वर्षभरात चार लाख ग्राहकांना नवीन वीज जोडणी देण्याचे उद्दीष्ट राज्य सरकारने समोर ठेवले असल्याचे ऊर्जामंत्री बावनकुळे यांनी सांगितले़