लंडन : महात्मा गांधीे यांचे ज्येष्ठ पूत्र हरिलाल यांनी स्वतःच्याच मुलीवर बलात्कार केला होता अशी धक्कादायक माहिती समोर आली आहे. महात्मा गांधींनी हरिलाल यांना लिहीलेल्या पत्रातून ही माहिती उघडकीस आली आहे.
महात्मा गांधीजींनी त्यांचा ज्येष्ठ पुत्र हरिलाल याला लिहिलेल्या तीन पत्रांचा लिलाव इंग्लंडमध्ये पुढच्या आठवड्यात होत आहे. जून १९३५ मध्ये ही पत्रे लिहिली असून, त्यात हरिलाल यांच्या वागण्याबद्दल चिंता व्यक्त करण्यात आली आहे. मुलॉक लिलाव कंपनीतर्फे त्यांची विक्री होत असून, त्यातून ५० ते ६० हजार पौंड मिळतील असे अपेक्षित आहे. हरिलाल यांच्या वर्तणुकीबद्दल गांधीजींना आक्षेप होता. तुझी समस्या माझ्यासाठी अधिकच अवघड झाली आहे, असे त्यांनी या पत्रात म्हटले आहे. मनू तुझ्याबद्दल अनेक भयंकर गोष्टी मला सांगत आहे. आठ वर्षापूर्वी तू तिच्यावर बलात्कार केलास, त्यानंतर तिला वैद्यकीय उपचार घ्यावे लागले असे तिने सांगितले.
मनू ही हरिलाल यांची मुलगी होती. ती साबरमती आश्रमात गांधीजींबरोबर राहत असे. ही पत्रे गुजराती भाषेत लिहिली असून, ती चांगल्या स्थितीत आहेत. गांधीजींच्या कुटुंबियांकडूनच ती सध्याच्या मालकाकडे आलेली आहेत. गांधीजी व त्यांचा मुलगा हरिलाल यांच्यातील नात्यासंदर्भात अशी माहिती याआधी बाहेर आली नव्हती. ही माहिती नवी आहे असे मुलॉकने यासंदर्भात प्रसिद्ध केलेल्या निवेदनात म्हटले आहे. २२ मे रोजी लुडलो रेसकोर्स येथे या पत्रांचा लिलाव होणार आहे. (वृत्तसंस्था)
पाश्चिमात्य शिक्षण घेण्यास मुलाला केला विरोध
> हरिलाल याला इंग्लंडला जायचे होते व पित्याप्रमाणे बॅरिस्टर व्हायचे होते; पण महात्मा गांधीजींनी त्याला पाश्चिमात्य शिक्षण घेण्यास विरोध केला.
> त्यामुळे १९११ साली त्याने कुटुंबाशी संबंध तोडले होते. आयुष्यभर त्याचे वडिलांशी दुराव्याचेच नाते राहिले.