कोल्हापुरात पूर्ववैमनस्यातून सेंट्रिंग कामगाराचा भोसकून खून
By admin | Updated: June 10, 2014 00:55 IST
मुख्य आरोपीस अटक; अन्य तिघे फरार
कोल्हापुरात पूर्ववैमनस्यातून सेंट्रिंग कामगाराचा भोसकून खून
मुख्य आरोपीस अटक; अन्य तिघे फरारकोल्हापूर : भावाला मारहाण केल्याचा जाब विचारण्यास गेलेल्या सेंट्रिंग कामगारास आज, सोमवार रात्री नऊच्या सुमारास चौघा तरुणांनी सत्तूरने भोसकले. गंभीर जखमी अवस्थेत छत्रपती प्रमिलाराजे रुग्णालयामध्ये दाखल केले असता उपचार सुरू असताना त्याचा मृत्यू झाला. नीलेश दशरथ कांबळे (वय २६, रा. सुधाकर जोशीनगर) असे त्याचे नाव आहे. याप्रकरणी मृताचा भाऊ दीपक याने पोलिसांत दिलेल्या फिर्यादीनुसार जुना राजवाडा पोलिसांनी रात्री उशिरा मुख्य संशयित आरोपी सचिन बबरू गायकवाड (वय २९, रा. कळंबा, ता. करवीर) याला अटक केली. तर त्याचे साथीदार संशयित प्रभू गायकवाड, अर्जुन दबडे, सहदेव कांबळे हे तिघे पसार असून, त्यांचा पोलीस शोध घेत आहेत. नीलेश कांबळे हा सेंट्रिंगचा व्यवसाय करीत होता. तो खडी-वाळू मिक्स करणारे मिक्सर मशीन भाड्याने देत असे. त्याच्या स्वत:च्या घराचे बांधकाम गेल्या काही महिन्यांपासून सुरू आहे. त्यासाठी त्याने खडी-वाळू आणून ती रस्त्याच्या कडेला ओतली होती. सोमवारी रात्री नऊच्या सुमारास त्याचा लहान भाऊ दीपक हा आपल्या घरी खडी भरून नेत होता. यावेळी या ठिकाणी संशयित आरोपी सचिन गायकवाड, प्रभू गायकवाड, अर्जुन दबडे, सहदेव कांबळे हे चौघेजण आले. यावेळी त्यांनी दीपकला मारहाण करीत मी जोपर्यंत या ठिकाणी आहे, तोपर्यंत खडी न्यायची नाही, अशी दमदाटी केली. त्यानंतर दीपकने घरी जाऊन हा प्रकार भाऊ नीलेश याला सांगितला. त्यामुळे त्याचा जाब विचारण्यासाठी तो बाहेर गल्लीत उभ्या असलेल्या चौघांसमोर आला. तू माझ्या भावाला का मारलास, असे त्याने विचारणा करताच सचिन गायकवाड याने जवळ असलेल्या सत्तूरने त्याच्या पोटात सपासप वार केले. यावेळी वार चुकविताना त्याच्या उजव्या हातावरही वार लागला. रक्ताच्या थारोळ्यात तो खाली कोसळला. त्यानंतर सर्वजण पसार झाले. गंभीर जखमी झालेल्या नीलेशला दीपकने रिक्षातून सीपीआरमध्ये आणले. याठिकाणी उपचार सुरू असताना त्याचा मृत्यू झाला. (प्रतिनिधी) चौकट............दीड वर्षापूर्वी हल्ला संशयित आरोपी सचिन गायकवाड हा सराईत गुन्हेगार आहे. तो सुधाकर जोशीनगरात यापूर्वी राहण्यास होता. सध्या तो कळंबा येथे राहण्यास आहे. परंतु त्याची ऊठबस सुधाकरनगरमध्ये नेहमी असते. कामधंदा न करता परिसरात दहशत माजवित वर्चस्व निर्माण करण्याचा तो नेहमी प्रयत्न करीत असे. दीड वर्षापूर्वी त्याने व त्याच्या भावांनी दीपक कांबळे याच्यावर तलवार हल्ला केला होता. त्यानंतर सहा महिन्यांपूर्वी त्याची व नीलेशची वादावादी झाली होती. हा वाद दोन-तीन वेळा मिटविण्यात आला होता. नीलेशही बिल्डर असल्याने त्याचेही भागात बर्‍यापैकी वर्चस्व होते, हे सचिनला खटकत होते. त्यातून आज खडी उचलण्याच्या वादाचे निमित्त करून नीलेशचा त्यांनी काटा काढल्याची चर्चा घटनास्थळी होती. ..............................................................फोटो : 09 कोल-नीलेश कांबळे