ऑनलाइन लोकमत
कोलकाता, दि. 7 - एकदम गप्प बस, आवाज बंद कर नाहीतर तुला पळवून बलात्कार करीन अशी धमकी एका 27 वर्षांच्या तरुणीला टॅक्सीच्या ड्रायव्हरने दिल्याची घटना घडली आहे. टाइम्स ऑफ इंडियाने दिलेल्या वृत्तानुसार या धमकीमुळे घाबरलेल्या या तरुणीने धावत्या गाडीतून उडी मारली आणि वाचण्याचा प्रयत्न केला. तरीही ड्रायव्हरने गाडी रिव्हर्समध्ये घेत तिच्यावर घालण्याचा प्रयत्न केला. सुरक्षिततेचा उपाय म्हणून अॅपच्या माध्यमातून तिने गाडी बुक केली होती.
कार ड्रायव्हर संतू परमाणिक याला पोलीसांनी अटक केली आहे. विनयभंग आणि हल्ल्याचा प्रयत्न असे गुन्हे त्याच्यावर दाखल करण्यात आले आहेत. सोमवारी साल्ट लेक भागात राहणाऱ्या या तरुणीने व तिच्या मैत्रिणीने अॅपच्या माध्यमातून रात्री 10 वाजता कार बुक केली. अरण्य भवनजवळ तिची मैत्रिण उतरली. त्यानंतर ड्रायव्हरने गाडीचा वेग वाढवला आणि गरज नसताना गाडी डाव्या रस्त्यावर वळवली, त्या तरूणीने ही माहिती दिली.
ड्रायव्हरने पुन्हा भलत्याच रस्त्यावर गाडी वळवल्यावर त्या तरुणीने हरकत घेतली. रस्ते निर्मनुष्य असल्याने त्या तरुणीने कार हमरस्त्यावर घेण्यास त्याला सांगितले. गल्लीतून गेल्यास वेळ वाचेल असे ड्रायव्हर म्हणाला. तिला हवा तो भाग गेल्यानंतरही ड्रायव्हर गाडी चालवत राहिल्याने तरुणीला वेगळाच संशय आला आणि तिने त्याला गाडी थांबवायला सांगितले. त्यावेळी ड्रायव्हर एकदम भडकला आणि त्याने तिला गप्प रहायला सांगत एक शब्द जरी बोललीस तरी रेप करीन करीन अशी धमकी दिली. तसेच ड्रायव्ह संतू परमाणिकने तिला पकडण्याचा प्रयत्न केला, मात्र त्या तरूणीने दरवाजा उगडत चालत्या गाडीतून बाहेर उडी मारली.
तरुणीने उबर या कंपनीकडे तसेच पोलीसांकडे तक्रार केली. संतूला 14 दिवसांची पोलीस कोठडी देण्यात आली आहे.