महामानवाच्या विचारांचा आदर्श सर्वांनी घ्यावा

महामानवाच्या विचारांचा आदर्श सर्वांनी घ्यावा
मुंबई : डॉ. बाबासाहेब आंबेडकर यांनी या देशाला संविधान दिले असून, त्यामुळे सर्वांना न्याय, हक्क मिळाले आहेत. त्यांनी महिलांसाठीही लक्षणीय कार्य केले असून, त्यांच्या विचारांचा आदर्श आपण सर्वांनी घेतला पाहिजे, असे प्रतिपादन महापौर स्नेहल आंबेकर यांनी केले.
छत्रपती शिवाजी महाराज, महात्मा फुले व भारतरत्न डॉ. बाबासाहेब आंबेडकर यांचा संयुक्त जयंती सोहळा महापालिकेच्या परळ टी.टी. येथील एफ/दक्षिण विभाग कार्यालयात पार पडला; यावेळी स्नेहल आंबेकर बोलत होत्या. यावेळी उपस्थितीत मान्यवरांनी छत्रपती शिवाजी महाराज, महात्मा फुले व भारतरत्न डॉ. बाबासाहेब आंबेडकर यांच्या प्रतिमांना पुष्पहार अर्पण केले. भदन्त लंकानंद थेरो (श्रीलंका) यांच्या उपस्थितीत त्रिशरण पंचशिल ग्रहण करण्यात आले.
डॉ. बाबासाहेब आंबेडकर यांच्या जीवन चरित्राचे दर्शन घडविणार्‍या छायाचित्र प्रदर्शनाचे उद्घाटनही यावेळी करण्यात आले. तसेच दादर येथील कमला मेहता अंधशाळेतील विद्यार्थ्यांना अंध व्यक्तिंना मदतकारक काठी, शाळेचे दप्तर व इतर साहित्य वितरित करण्यात आले. (प्रतिनिधी)
...................................